Angutip inuusuttup illuni qimagussorneqartunut atukkiukkusuppaa

Ajunaarnersuup nunaqarfik Nuugaatsiaq sapaatip-akunnerata naanerani eqqorpaa, tassani nunaqarfiit pingasut qimagussortitsiffigineqarput.

Ajunaarnersuaqarnera 23-nik ukiulimmut Aqqalu Hansenimut annertuumik sunniivoq.

- Qasigiannguani illora qimagussorneqartut akeqanngitsumik atorsinnaavaat, Sermitsiaq.AG-mut oqarpoq.

Aqqalu Hansen Qasigiannguaneerpoq, maannakkulli biililerisutut ilinniarluni Nuummi najugaqarpoq, ukiunilu marlunni suli ilinniartussaavoq.

Eqqissillutik inuunissaat
Qimagussorneqarsimasut eqqissillutik inuunissaat taassuma neriuutigaa.

- Nunaqarfinnit qimagussorneqartut ajortumik misigisaqarput, ungasikkaluarlungalu sapinngisara tamaat ikiuukkusuppunga. Inoqatikka ikiussallugit piareersimasuaannarpunga, taamaammat illora Qasigiannguaniittoq inunnut ajunaarnersuarmit eqqugaasunut ammavoq, Aqqalu Hansen oqaluttuarpoq.

Illu tuniniaraluarlugu taanna ilisimatitsivoq.

- Pisissamik piareersimasoqaraluarpoq, kisianni illup tunineqannginnissaa aalajangiuppara, taarsiullugu eqqugaasunut atorneqarsinnaassaaq. Aningaasat uannut isumaqanngillat, inoqatikkalu nuannaartut takorusunneruara, taanna erseqqissaavoq.

Piffissaligaanngitsumik atorneqarsinnaasoq
Illu Qasigiannguaniittoq piffissaligaanngitsumik attartorneqarsinnaasoq, Aqqalu Hansen ilisimatitsivoq.

- Inuiaqatigiit maannamit ikiuunnerunissaannik neriuuteqarlunga taamaaliorpunga, eqqugaasullu ikiorneqartutut misiginissaat, misigisaminnillu aamma sukkanerpaamik ingerlaqqillutik eqqissinissaat, Aqqalu Hansen oqarpoq.

Ajunaarnersuarmit eqqugaasimagaanni, taamaalillunilu angerlarsimaffissaarulluni, taava Aqqalu Hansenimut sianertoqarsinnaavoq, mobil 27 77 75.