Vores bloggere
Angutinik arnaqatinnillu atoqateqartarpunga tamannalu ammaffigaara
Tina Egede Sermitsiaq.AG-mi bloggertartut nutaat ilagaat. Bloggimi ilanngussamini siullermi kinguaassiuutitigut atoqateqartarnini ammasumik allaaseraa
- Aap, imminut angutinik arnaqatinnillu atoqateqartartutut taasarpunga, arnanut angutinullu kajungerinnittuugama. Namminiullunga misigisimanerusarpunga arnamik ilaqaraangama. Qaneqatigiinnermut tunngavoq nassuiarneqarsinnaanngitsoq.
- Ilaannikkut kinguaassiuutitigut atoqateqartarnera pillugu aperineqartarpunga. Apeqqutit amerlanerpaat angutineersuusarput, aperisarlutik "qanoq isilluni?", "arnap sumik neqeroorfigisinnaagamisit angutip sapigaanik?", aamma "arlaat toqqarsinnaannginnakku?".
Taamatut quppernermi nittartakkami matumani bloggimut ilanngussamini siullermi allappoq 24-nik ukiulik Tina Egede, taassumalu angutinik arnaqatiminillu ilaqartarnini unneqqarissumik allaaseraa.
Naleqqulluinnartumik tamanna pivoq arfininngormat Nuummi, najugaqarfiani, Gay Pride-p ingerlanneqarnissaa sioqqullugu.
Bloggimi makkua sammineqarput
Tamanna pivoq Sermitsiaq.AG-p bloggertarfianut nutaamut atatillugu, tassani bloggertartut nukittut katersorsimallutigit tamarmik immikkut sammisaqartut, bloggerutigineqartarlutik sammisat soorlu politikki, oqaatsit, naalagaaffiup sananeqarnera, kinguaassiuutitigut atoqateqartarneq, nerisassat, inuusuttuuneq, Danmarkimi ilinniagaqartuuneq, aallartitsisuuneq, timersorneq, uumasut aamma Greenpeace. Sammisassarpassuillu allat, tamarmik tusagassiornitta tapertaattut - taartaattuunngitsoq.
Bloggertartoqarpugut 15-inik - inuit assigiinngitsunik ukiullit ilisimaneqartut ilisimaneqanngitsullu. Tine Egede bloggertartut qulissaraat bloggiminik siullermik ilisaritinneqartut. Bloggertartullu sinneri siunissami qaninnerpaami ilisaritinneqassapput.
'tina Egedep bloggertartullu allat ilanngussaat tamaasa atuakkit uani