Ilulissat
Angut uumasunik naalliutsitsisutut unnerluussaavoq
Qimmit Ilulissani perlerlutik toqusut piginnittuat maanna politiinut nassuiaareersimalerpoq sooq qimminik nerukkaasarsimannginnerminik
Ilulissani politiit qimmiutilik uumasunik naalliutsitsisimasutut unnerluutigaat. Tamanna pivoq qimmii pingasut perlerlutik toqoreersut allallu marluk kaattupilussuit toquinnarneqarlutik. Qimmiutilik politiinut nassuiaavoq nerukkaatissanut akissaqarsimanani.
Atuaruk: Qimmit pingasut perlerlutik toqupput
Ilulissani nersutit nakorsaat, politiit kommuunimeersullu Ilulissani qimmilivimmut sisamanngornermi aggersarneqarput tassani qimmit pingasut perlerlutik toqusimasut nassaarineqarmata. Kommuunip qimminik toqoraasuata aamma qimmit allat marluk naalliunnerat kipitippaa. Suliaq maanna politiiniippoq.
- Qimminik piginnittoq attavigereerparput uumasunillu naalliutsitsisimasutut unnerluutigalugu, Qaasuitsumi politiit pisortaat Mikael Storgaard Sermitsiaq.AG-mut oqarpoq.
Qimminik piginnittup sooq qimmit perlilernerannut nassuiaataa politiit uissuumissutigaat.
- Oqaluttuuppaatigut nerukkaatissanut akissaqarsimanani. Qimmit naalliulerpallaartinnagit oqartussat inuillu allat pisumik kalerrinneqarsimasariaqaraluarput, Mikael Storgaard oqarpoq.
Pisoq maanna eqqartuussivitsigut ingerlaqqittussanngorpoq.
Nersutit nunatsinni nakorsaanerat Sanne E. Wennerberg erseqqissaavoq qimmiutillit amerlanersaasa aasaanerani nerukkaasarneq imertitsisarnerlu isumagilluartaraat. Taamaattoq pisariaqarsoraa aasami nerukkaasarnerup pingaaruteqassusaata eqqumaffigiuarnissaa.