Siorapalummi pisoq alianartoq
Angut Siorapalummioq suli peruluppoq
Siorapalummiut pingasut nerisaminnik napparsimalersut peqqissisutut nalunaarutigineqarput. Angulli inuusuttoq suli peruluppoq
Siorapalummiut sisamat nerisaminnik napparsimalerlutik SANAmi uninngatinneqartut peqqissiartorluarput. Angulli inuusuttoq suli sinitsinneqartoq, Johanne Nielsen qanigisaasunut qanimut attaveqartoq oqaluttuarpoq.
- Sisamat maanna siumukarluarput angulli inuusuttoq pillugu annerusumik paasisaqarnissarput suli utaqqivarput, Johanne Nielsen Sermitsiaq.AG-mut oqarpoq.
Inuit marluk sapaatip akunnera kingulleq Siorapalummi toqupput nerisaminnik napparsimalernertik pissutigalugu. Inuit tallimat allat Nuummi Dronning Ingridep napparsimmavissualiaanneqarput.
Katersuiniarneq
Napparsimalersut qanigisaat nunarsuarmi inoqarfiit avannarlersaanni Siorapalummiuupput. Taamaammat Johanne Nielsen aamma Juliane Henningsen aningaasanik katersuiniarnermik aallartitsipput qanigisaasut Nuummut ingiaqataasut najugaqarnertik nerisaqarnertillu nammineq akilertussaammassuk.
- Inuit pingasut misissugassatut uninngasut peqqissisutut nalunaarutigineqarput. Ataaseq peruluttuni uninngatinneqartoq immikkoortumut naliginnaasumut nuunneqareerpoq. Neriuppugut angut inuusuttoq suli peruluttuniittoq aamma siumut saalertorumaartoq, Johanne Nielsen oqarpoq.
Katersuiniarnermut ikiuuteqataasinnaavutit aningaasanik uunga ikisinikkut:
Grønlandsbanken: 6471-1253732