Tasiilaq
Angut politiinut aallaasersortoq toqungasoq siumorneqartoq
Tasiilami annilaarnartumik marlunngornerup ullaassaani pisoqarpoq. Toqusoqarsimatillugu paasiniaasartoq sooq angut toqusimanersoq paasiniassavaat - politiit angutip inaanut ikuallattumut qulliliornartoq igippaat
Angut Tasiilami toqunera pissutaalluni toqusoqarsimatillugu misissuisartut Danmarkimeersut sukkanerpaamik Tasiilamukaanneqarput.
Vicepolitimesteri, Morten Nielsen nalunaarpoq.
Tasiilami politiit nalunaaqutaq 02.00 nalunaarfigineqarput angummik aallaasersornissamik siorasaarisumik. Politiit takkummata angut politiit tungaannut igeriarpoq. Tassanngaannit politiit qulliliornartumik angutip isersimaffigisaanut milorujussipput.
Angut igeriaqattaarpaluttoq politiinit tusaaneqarpoq, kiisalu angutip isersimaffigisaa ikuallalerluni.
Ini qatserisartunit qaminneqarpoq, tassanilu angut toqungasoq siumorneqarluni.
- Peqataasunut misigisaq imaannaanngilaq, Morten Nielsen Sermitsiaq.AG-mut oqarpoq.
Igeriarnerit
- Angut qasseriarluni politiit tungaannut igeriarpa?
- Ikinnerpaamik ataasiarluni politiit tungaannut igeriarpoq.
- Angut sooq toqusimanersoq paasineqarpa?
- Naamik suli paasineqanngilaq. Angut kinaanersoq toqusoqarsimatillugu misissuisartunit paasineqaqqaassaaq. Annertunerusumik paasissutissaateqanngikkallarpugut, Morten Nielsen nassuiaavoq.
Pisoq Rigspolitiet suleqatigalugu misissorneqaleruttorpoq.