Nuuk
Angut aqqusinermi pisooqarfiusumi aallaammik ummiussisoq
Illoqarfiit pingaarnersaanni politiit sapaatip akunneranut nalunaarutaat pisunik nuanninngitsunik aamma tillinniarnernik oqaluttuarpoq
Nuummi politiit tallimanngorneq 31. juli nalunaarfigineqarput, Niels Hammekensvejip nalaani inuk aallaaserluni ingerlaartoq.
- Angut sakkutuutut pissusilersorluni illut tungaannut umerpoq. Politiit pisoqarfiusumut ornigupput angullu tigusaralugu, taannalu eqqartuussivilersuunneqarumaarpoq, Nuummi politiit tusagassiuutinut nalunaarummi ilisimatitsipput.
Politiit aamma misigisaqarfigaat, angut aalakoortoq politiimut ajattaasoq. Taanna tigusarineqarpoq politeeqarfimmilu unnuisinneqarluni. Angut iperagaagami saassussinini pissutigalugu akiligassinneqarpoq.
Tillinniarnerit
Tillinniarnerit maanna pingaartillugit politiinit suliarineqarput, aamma inuit nammineerlutik angerlarsimaffitik qulakkeertarnissaannut kajumissaarneqarput.
- Qulakkeeriniaraanni immaqalu tillinniarfigitinnissaq pinngitsoorlugu, taava igalaat matullu paarnaaqqatinnissaat angerlarsimaffik qimakkaanni naleqquttuuvoq, aammalu affarlit nakkutiginnittussatut isumaqatigisinnaagaanni pitsaasinnaavoq, tusagassiuutinut nalunaarummi taama allaqqavoq.
Tillitat tuniniaruminartut
Nuummi tillinniat aasaanerani pisiassat Appleminngaanneersut tillissallugit muterileqqagunarpaat. Tassami Nuummi politiit tillinniarnermut misissuineranni takussaasimapput.
Taakkulu tuniniassallugit ajornarsimanngillat, taamaammallu iphonit, ipadit aamma mac-bærbarit amerlasuut tillinneqartarput, politiit taama naliliipput.
- Tamannalu isumaqarpoq, tillinniat saniatigut tillitanik pisisartunik inoqartoq. Tamakkulu pisut misissorneqarput, pisuusullu pillagaasarput paasineqaraangamik, politiit taama nalunaarput.
Pisat atornikut tillitaannginneri qulakkeerniaraanni, politeeqarfimmi allaffimmut pisiarisaq serienormualu nassarlugu misissortinneqarsinnaapput.