Aasiaat
Angut aalakoortoq aallaasisarmat politiit mianersorluinnarput
Aasiaat illoqarfiata ilaa nalunaaquttap akunneri arlallit marlunngornermi politiinit assersorneqarpoq
Angut 56-nik ukiulik Aasianni imminut toqunniarluni marlunngornermi sioorasaarivoq aallaammillu tigumiarsimalluni. Illoqarfiup kangiatungaa sillimaniarneq eqqarsaatigalugu politiit assersorpaat angullu tunniutiinnarnissaanut akuersitillugu.
Angutip aalakoortup imminut toqunniarluni sioorasaarineranik Aasianni politiit marlunngornermi unnukkut nalunaaqutap arfernup missaani nalunaarfigineqarput. Angutip inooqataa nalunaarutiginnittuuvoq oqaluttuarlunilu angut aallaammik tigumiartoq.
Qaatusserpaat
- Nalunaarutiginnittoqarnerata kingorna angut aallaaseqarluni qimaasimavoq. Taamalu pisoqarnerani suleriuseq aalajangersimasoq malillugu illoqarfiup ilaa assersorparput. Angut attavigalugu tunniutiinnarnissamut akuersitipparput qujanartumillu aallaammik igeriartoqanngilaq aqqusinermillu assersuineq nalunaaqutaq 20.30 taamaatipparput, Aasianni politiini ulluinnarni aqutsisuugallartoq Nuunu Larsen Sermitsiaq.AG-mut oqarpoq.
Angut imigassartorsimammat qaatusserneqarnerani politeeqarfimmiitinneqarpoq.
Aasianni politiit ilanngullugu oqaatigaat akissarsisoqarneranut atatillugu illoqarfimmi ernguttoqangaatsiartoq.