Hash
Angut 24-nik ukiulik Nuummeersoq Roskilde Festivalimi hashimik tigummiartutut unnerluutigineqartoq
Angut 24-nik ukiulik Nuummiittoq sapaammi unnukkut tigusarineqarpoq, hashimillu 90 gramimik piginnittutut unnerluutigineqarluni. Hashi mikisunngorlugu aggorneqarsimavoq, politiiniillu 'tuniniagassatut' nalilerneqarpoq.
Angut 24-nik ukiulik Nuummeersoq unioqqutitsilluni hashimik tigummiarutut, sapaammi unnukkut nalunaaqutaq 18.45 politiinit unnerluutigineqarpoq.
Midt- og Vestsjællands Politiit attaveqaqatigiinnermut akisussaasua, Carsten Andersen Sermitsiaq.AG-mut oqarpoq.
Silatinnguani tigusarineqartoq
Roskilde Festivalip iluani silataanilu qimmit aanngajaarniutinik ilisarinnissinnaasut politiit atortorujussuusarpaat. Tassanilu angut taanna 24-nik ukiulik sumiiffimmut isilernernermini festivalip silatinnguani tigusarineqarpoq.
Carsten Andersenip angut qanoq pineqarumaarnersoq oqaatigeqqissaarsinnaanngilaa, kisianni taamatut pisoqartillugu nalinginnaasumik taanna 24-nik ukiulik akiligassitsillunilu mianersoqqussummik tunineqassaaq, kingornalu festivalimut peqataasinnaanngoqqissaaq.
Ullumi juunip 26-anni nunarsuaq tamakkerlugu aanngajaarniutinut atornerluinermut aamma unioqqutitsilluni tuniniaanermut ulloq akerliuffiuvoq.