pilluaritsi
Angut 18-nik ukiulik aalisartoq aamma angut 54-nik ukiulik piniartoq nersorneqartut
Carl Egedep Aningaasaateqarfianit 2014-mut nersornaasiisoqarpoq
Piniartoq Albricht Kreutzmann, 54-nik ukiulik, Kangaamiut.
Aamma aalisartoq Erninnguaq Kruse, 18-inik ukiulik, Niaqornat.
Tassaapput taakku Carl Egedep Aningaasaateqarfiata siulersuisuisa decembarip 29-anni nersornaaserneqartut.
Piniartoq utoqqalisoq aamma inuusuttunnguaq aalisartutut nunaqarfimmini maligassiuisoq nersornaaserneqartussatut aalajangerneqarput.
Niaqornani KNAPK-p immikkoortortaqarfiata Erninnguaq Kruse pillugu ilaatigut ima innersuussaqarput:
- Erninnguup, eqeersimaartuusup ataatani ukiut sisamat matuma siorna anorersuaqisoq angalaqatigisimanngikkaluaruniuk ajorluinnartumik pisoqarsimassagaluarpoq. Anorersualeruttorfiani aalisariut 30 fodinik angitigisoq aquttarsimavaa, ataataata aalisariut kinngoqqunagu imaarsaraa.
Kangaamiuni KNAPK-p immikkoortortaqarfiata Albricht Kreutzmann pillugu ilaatigut ima innersuussaqarput:
- Angallammik Inungasumik piginnittoq, Albricht Kreutzmann, ajoraluaqisumik tassanngaannartumik ukiut marluk matuma siorna ajoquserujussuarpoq, ullumikkut aalisarsinnaajunnaarneranik piniarsinnaajunnaarneranillu kinguneqartumik. Albricht Kreutzmannip Inungasoq ataataminit kingornussimavaa. Inungasup nunaqarfipput kommunilumi, Maniitsoq, ukiut 50-it sinnerlugit arferup neqaanik pissaqartitsisimavai.
Nersornaaserneqartut najugaasa aalisartut piniartullu peqatigiiffiisa innersuussaraat aamma kommunalbestyrelsinit innersuussaallutik.
Nunaqarfinni aqutsisut allaffiini Carl Egedep aningaasaateqarfia sinnerlugu nersornaatit tunniunneqarput.