Anguniagaq: Inuusuttut 95 procentii ilinniagaqarfinnut ingerlaqqittalissapput

Asii Chemnitz Narup (IA) Kommuneqarfik Sermersuumi borgmesterinngoqqikkusuppoq.

Inuusuttut amerlanerusut meeqqat atuarfiat qimakkaagamikku ilinniaqqiffinnut suliffeqarfinnulluunniit ingerlaqqittarnissaat qinerneqaqqinnissaminut qineqqusaarutaasa ilagivai.

Pinngortitami atuartitsineq

Danmarkimi Løkke-Fonde aaqqissortagaanik assigusumik aasaanerani atuarfimmi pilersitsisoqarnissaa, Asii Chemnitz Narup (IA) siunnersuutigaa.

- Nunarsuarmi pisunut maligassiuvisunulli isumassarsiorlunga nuannarisaraara, Asii Chemnitz Narup (IA), Sermitsiaq.AG-mut oqarpoq.

Løkke-Fondenip aasaanerani nukappissanut atuagarsornikkut ajornartorsiutilinnut aaqqissuisarpoq. Sapaatip akunnerini marlunni allamut saannaveersaarluni suliaqartarneq inuusuttunut ukioqatigiinnut iluaqutaasimavoq.

Isumassarsiap Nunatsinnut tulluussarneqarnissaa Asii Chemnitz Narupip (IA) tulluussoraa.

- Isumaqarpunga pinngortitaq atornerusariaqaripput soorlu inulerinermik sullitaqartut taama suleriaaseqareersut, Asii Chemnitz Narupip (IA) oqarpoq.

- Ilinniartitseriaatsip taassuma timikkut pisinnaasat aammalu nerisassioriaatsip ilaatigut imminut ataqatigiisilersissinnaavai.

Tulliani aningaasanut misserngersuusiornissami suliniummut aningaasanik immikkoortitsisoqarnissaa siunnersuutigissamaarpaa. Anguniagaavoq inuusuttut meeqqat atuarfiiniik ingerlaqittartut amerlisarneqarnissaat.

73 %-miik 95 %-imut

Kommuneqarfiup kisitsisaataasa takutippaat 73 procentii meeqqat atuarfianiik ilinniagaqalerlutik suliffittaarlutilluunniit ingerlariaqqissimasut.

Aasaanerani atuarfiup pilersinneqarnerata kingorna 2019-imi 80 procenti anguniarneqarpoq. Ukiunilu tulliini kisitsisit anguniakkat 5 %-imik qaffanneqartassapput, 95 % angutserlugit.

- Kommunalbestyrelse marsip arfineq aappaani ataatsimiinneqaranni atuarfeqarnermut pilersaarutaagallartumut assersuunneqarsinnaavoq. Meeqqat atuarfianni atuartut ilinnialernissamut suliffittaarnissamulluunniit piareersarneqartarnissaat takorluukkat ilagivaat.

Asii Chemnitz Narup (IA) qinigaaqqikkuni atuarfeqafiit suliniutigerusuppai. Meeqqammi atuarfianni atuartut ataasiakkaat ineriartornissaminnut anguniagaasa nakkutigilluarnissaat, alloriaqqinnissaminullu piareersarnissaat pisariaqarluinnarpoq.