Nuummi angerlarsimaffeqannginneq
Angerlarsimaffeqanngitsut siniffissanit amerlanerusut
Angerlarsimaffeqanngitsut 35-riarlutik Nuummi unnuffiugallartumut innersuunneqarsimapput, Café Kialaarfimmi inissat 36-iusut tamarmik atorneqarnerat pissutigalugu
Nuummi Café Kialaarfik inini nutaani Kujallerpaat 7-mi februaarip naanerani atoqqaartitsinerup kingorna maanna angerlarsimaffeqanngitsunut 36-nut unnuinissamut neqerooruteqarpoq. Kisianni ammarnerata kingorna sapaatip akunnerini siullerni siniffinnik pisariaqartitsineq tamatuminnga annertuneruvoq.
Aamma atuaruk: Ujartueqatigiit atornerluisut aamma angerlarsimaffeqanngitsut nanisassavaat
Kommuneqarfik Sermersuumi isumaginninnermut, suliffeqarnermut inuussutissarsiornermullu ataatsimiititaliaata ullumi oqaluuserisassaanni tamanna atuarneqarsinnaavoq.
''Piffissami 23. februaarip 6. marsillu akornanni, itigartinneqartarsimagaluartut innuttaasut katillugit 35-t siniffissaqartinneqarsimapput,'' ataatsimiititaliap oqaluuserisassaani allaqqavoq.
- Angerlarsimaffeqanngitsut pingasut sisamalluunnit inissaqartinneqanngitsunut innersuunneqarsimasunut tamanna tunngassuteqarpoq, Kommuneqarfik Sermersuumi attaveqatigiinnermut pisortaq Lars Damkjær nassuiaavoq.
Immikkut ittumik pisariaqartitsineq
Ingerlatsiviup ataatsimiititaliaq allileeqqinnissamut pisariaqartitsisoqartoq paasissutissippaa, unnuiffissat pisariaqartinneqartut amerlanerummata. Café Kialaarfimmi init Kongevejimiittut isaterneqarnissaat pilersaarutaagaluarpoq.
Aamma atuaruk: Angerlarsimaffeqanngitsunut unnuiffissiaq atulerneqarpoq
- Ingerlatsiviulli innersuussutigaa, Blok B-mi inissianik attartorneq maannamut ingerlatiinnarneqassasoq. Tamatumunnga peqqutaavoq, innuttaasunik unnuiffissaqanngitsunik unnuerusukkaluartunik Café Kialaarfimmi sulisunit itigartitsisoqartariaqartarsimammat, pissutigalugu unnuisarfimmi inissat 36-t tamarmik atorneqarmata, ullumikkut ataatsimiinnermi oqaluuserisassani atuarneqarsinnaavoq.
Pisariaqartitsisoqartillugu ammaannassasoq
Containerini inissiat decembarimi pisiarineqartut atorneqarsinnaalerpata, init Blok B-miittut isaterneqarnissaat kommunip naatsorsuutigaa.
Aamma atuaruk: Kommunimi sulisoq kukkorujussuartoq: Angut inuusuttoq ulluni 17-ni mattussaaqqasoq
- Barakkit modulikkaartut atoriaannanngornissaasa imaluunniit unnuisarfiup atorneqarpallaarunnaarnissaata tungaanut, inissatigut alliliigallarneq atorneqassasoq naatsorsuutaavoq. Pisariaqartitsineq ingerlatsivimmit qanimut malinnaavigineqassaaq siniffiillu saniatigut atukkat naammakkunnaarpata inissaqassuseq naleqqussartassallugu, tamanna oqaatigineqarpoq.