inissiaq
Angerlarsimaffeqanngitsut inissiassaannut suliniummut akerliusut
Kommunip containerinik angerlarsimaffeqanngitsunut atorneqartussanik pilersitsiniarneranut Nuummi Qernertunnguani najugaqartut akerliusimapput. Akerliusoqaraluartoq Sanaartornermut Avatangiisinullu Ingerlatsiviup suliniut politikerinit akuerineqarnissaa innersuussutigaa.
Tamanna nutaanik sanileqalernermi toqqissisimannginnerulernermik nipiliornermillu kinguneqarnissaa najugaqartut ernumassutigaat, taakku inunnut angerlarsimaffeqanngitsunut inuiaqatigiinnut akulerutitinniarneqartunut najugaqarfissanngortinneqassapput. Inissiat immikkuullarissut taakku paaqqinnittarfiup Soralup eqqaani inissinneqarnissaa maluginiaqquneqarpoq.
Najugaqartut maalaaruteqarnerannut tusarnaartoqarsimasoq, taamaattumillu najugaqarfiup nakkutigineqarnissaa piumasarineqarsimasoq, tamannalu nunaminertamik atuinissamut akuersinermut piumasaqaataasoq kommunip ingerlatsiviata innersuussinermini naqissuserpaa.
Inissisimanera tulluassanngikkaluarpat, ingerlatsiviup aammattaaq nunaminertamik atunissamut akuersissutip atorunnaarsinnissaanut piffissami killilimmik atuutsitsivoq, tamanna Sanaartornermut Avatangiisinullu Ingerlatsiviup ataatsimiititaliami politikerinut innersuussinerani januaarip 22-anni oqaluuserineqartussami tamanna atuarneqarsinnaavoq.
Iserit ullormut nakkutilliinermik suliaqartuussaaq. Containerini inissamik pissarsinissamut piumasaqaatit ilagaat suliffeqarnissaq.