Københavnimi toqusoq
Angerlarsimaffeqanngitsup toquneranut kukkusoqarsimanera nassuerutigineqarpoq
'Ajoraluartumik inuttut kukkussutit' pissutigisaanik angut aqqusinermi toqusimasoq oqaatigineqarpoq
Pinartumik suliaqartilluni malittarisassat malinneqarsimanngitsut Danmarkimi Region Hovedstadenimit nassuerutigineqarpoq. Angut kalaaleq 32-nik ukioqartoq Amagerimi toquvoq, minutsit pingasut qaangiummata ambulancet takkupput.
Angut nunami nalasoq innuttaasumit ikiorneqarpoq. Ikiuisoq ambulancenut pingasoriarluni sianerpoq, siullermik sianernerminit minutsit 26 minutsit qaangiuttut aatsaat ambulancet apuupput.
Ambulancet takkunniarnerat sivisuallaartoq Region Hovedstadenimit nassuerutigineqarpoq.
Inuttut kukkunerit
Pigasuartoqarnerani sulisartut misissuineranni paasinarsivoq sulisorineqartut kukkuluttornerat pissutaalluni ambulancet takkutiaarsimanngitsut. ¨
- Inuttut kukkunerit pissutigisaannik ajuusaarnartumik pisoqarpoq.
- Kukkunerit annertupput, piffissaq eqqorlugu ambulancet aallartinneqanngillat, ilaatigut Region Hovedstadenimit oqaatigineqarpoq.
Aalakoortoqaannartoq siullermik nuutitsisarfimmit paasineqarpoq, taamaattumik nakorsaq Amagerbro Stationiliartinneqarpoq. Angut nalasoq kalaaliunersoq apeqqutigineqanngilaq. Nakorsaq politiinut sianerpoq, angullu anerningereersoq politiit takkupput. Politiit ambulancenik takkuttoqassasoq sianerput, minutsit pingasut qaangiunneranni takkupput.
Angut imigassartungaatsiarsimavoq.
Pisoq eqqunngitsumik suliarineqarsimasoq pigasuartoqartillugu saaffiginnittarfimmit nassuerutigineqarpoq.
- Siullermik sianertoqarneranit ambulancep takkunnissaata tungaanut piffissaq atorneqartoq sivisuallaarujussurpoq. Ambulancet apuummata angut anerningertareersimavoq. Tamanna ajuusaarnarpoq, tamannalu aamma uagutsinnut soorunami sunniuppoq.