Nuuk

Angerlarsimaffeqanngitsunut akiliisitsarnissaq qatangiinnartinneqartoq

Nuummi angerlarsimaffeqanngitsunut unnuisarfimmi unnuineq akeqassanngilaq. Taama Kommuneqarfik Sermersuumi kommunalbestyrelsi marlunngormat aalajangerpoq

Angerlarsimaffeqanngitsunut unnuisarfik atuisunit akeqanngitsumik atorneqaannassaaq

Kommuneqarfik Sermersooq angerlarsimaffeqanngitsunut unnuisarfimmi sapaatip akunneranut 350 koruuninik akiliisitsisalerniarluni qaammatip aallartilaarnerani isumaliutersuuteqaleraluarpoq.

Akit assigiinngitsut marluk akiliutigineqartartussatut tagginneqarput. Tassa piitsuunerpaanut 20 koruunit 'peqarnernullu' 50 koruunit.

Kisianni Nuummi angerlarsimaffeqanngitsunut unnuisarfik unnuiffigissallugu atuisartunut suli akeqartinneqalinngilaq. Taama Kommuneqarfik Sermersooq nalunaaruteqarpoq.

Atuaruk: Angerlarsimaffeqanngitsut akiliuteqartalernissaat siunnersuutigineqarpoq

Kommuunip ukiumut 299.000 koruunit isertitassaraluani sussakkeerai
Kommuneqarfik Sermersuumimi kommunalbestyrelsip marlunngornermi aalajangerpaa angerlarsimaffeqanngitsunut akiliisitsisarnissamut siunnersuummut itigartitsinissani.

- Allaffissornermik suliaqartut akileqqusisarnerisigut angerlarsimaffeqanngitsut anigaasaatituannguinik akileeqquneqartarnissaat ersissutigaarput”, Isumaginninnermut, Suliffeqarnermut Inuussutissarsiuteqarnermullu ataatsimiititami siulittaasoq, Iddimanngiiu Bianco (IA), oqaluuserinninnermi oqarpoq, uffa ataatsimiititami siulittaasup tulliata, Storm Ludvigsenip, angerlarsimaffeqanngitsut unnuisarnerminnut akiliisannginnissaat nuannaarutigigaa.

Atuisartutut akileqqusisarnissaq kommunip karsianut ukiumut 299.000 koruuninik isertitaqaataasussaagaluarpoq.

Powered by Labrador CMS