imaani annaassiniaanerit
Angallat alapernaarsuut naggammik angalanermini angut inuusuttoq annaappaa
Angallat alapernaarsuut Tulugaq naggammik angalanerani angut inuusuttoq annaanneqartoq
Angallat alapernaarsuut Tulugaq ulluni makkuni Kujataani ukiut sisamat sakkutuut imarsiortut Kalaallit Nunaata imartaani sullitereerlugu naggammik angalavoq.
Motorimik unittoorluni navianartorsiortoq
Ulluni kingullerni Qaqortumeereerluni, angallat Nanortalimmut ingerlaarpoq, Tulugarmi septembarip ulluisa aallaqqaataanni 1984-miilli Nanortalimmi "najugaqartuusimavoq".
Angallatip naalagaa, Stig André Hansen inuttaatalu Uunartumi taseq uunartoq tusaamaneqarluartoq nalunnguarfigilaassallugu pilersaarutigisimavaat. Taamatullu pilersaaruteqarneq angutip inuusuttup annassutigaa, Tulugarmi Uunartumeereerluni Nanortaliup tungaanut ingerlaanerani, Nanortalimmiu angut inuusuttoq, Kaj Semsen 32-nik ukiulik motooriminik unittoorluni navianartorsiulersimavoq.
Kaj Semsenip tallimanngornermi ulloq 10. november nal. 13:00 missaani umiatsiaaqqani "Nuumit 19" atorlugu kammalaatini Nanortalimmiu Ammassiviliaassimavaa. Kaj Semsenillu kammalaalitini Ammassivimmut apuuteriarlugu ulloq taanna nal 16:30 missaani Nanortalimmut uterluni aallarpoq. Kaj Semsenilu nalunaaquttap akunneri 1 1/2 tiimit ingerlaareerluni umiatsiaaraa motorilulersimavoq. Siullermik qerrussat motoorip sarpiinut nermussimapput. Kajillu qerrussat peeriarlugit motoori aallarteriarsimangaluarpaa, motoorili uuliaarussimasoq paasinarsisimavoq, umiatsiaararlu taamaasilluni motoorimik unittoorpoq
Taarsiartortoq
Taarsisimavoq taannalu ernumalersimalluni, qujanartumillu angallat alapernaarsuut Tulugaq Kajip motoorimik unittooqqaffia aqqugtigalugu Nanortaliup tungaanut ingerlaarpoq.
- Sumiiffigisanni Tulugap takkuteriasaarnera nalaatsornerinnaavoq. Qiialersimavunga kaalersimallungalu. Isumannaatsumiilerpunga, kialaartumiilerlunga nerisassanik uunartunik tunineqarlunga. Angallatip inuttaatalu umiatsiara ilanngullugu annaammatigut qujamasoqaanga, Kaj Semsen nuannaangaarluni oqarpoq.
Aappassaa
Kaj Semsenip angallatip naalagaa oqarfigaa Tulugap aappassannik ikiuunnera pissutigalugu tulliani umiatsiartaaruni atserniarlugu Tulugaq. Siullermik ikiuunneq pisimavoq taanna Kangerluarsorutsip avataani kammalaatinilu aalisartillutik assammigut oqummersarnerata kingunerisaanik. Tulugaq taamani qanitatsiniippoq taakkuli Radio Medicalimut sianersimapput oqummersallu assammiit qanoq peerneqarnissaanik ilitsersuunneqarlutik. Aalisartoq ikiorneqarsimavoq kingornalu piareeqqissimalluni.