Angallassinerit akikinnerulerlutillu pitsaanerulernissaat kujataani politikkerinit naatsorsuutigineqarpoq

Kommune Kujallermi kommunalbestyrelsimi ilaasortat isumaqatigiissutigaat kujataani angallannerup tungaatigut aappaagumiit aaqqiissutigineqartussat pillugit isumaqatigiinniarnerit qanoq inerneqarumaarnerat utaqqeqqaarallarneqassasoq.

- Neriuutigalugulu naatsorsuutigaarput angallannikkut pissutsit aaqqiivigineqarnissaanni ingammik nunaqarfinnut angallasseriaatsit pitsanngorsaavigineqarlutillu akikilliliiffigineqarnerannik kinguneqartussanngorlugit inerneqarumaartut, paasitinneqarnerporlu naapertorlugu isumaqatigiinniarnerit suli naammassineqaratik suli ingerlapput, taamaattumik isumaqatigiinniarnerit naammassineqarnissaat utaqqeqqaarniarlutigu akunitsinni isumaqatigiippugut, kommunabestyrelsimi ilaasortat partiinit pingasuneersut ataatsimoorlutik taama oqariartuuteqarnissartik isumaqatigiissutigaat, Kommune Kujallermi kommunalbestyrelsimi ilaasortaasut ataatsimut tusagassiutinut nalunaaruteqarput.

Soraarsitsinerit
Nunatta kujataani angallasseriaatsip 2015-mi malunnaatilimmik allanngortinneqarnissaa pissutigalugu Air Greenlandimi atorfeqartut 640-sut akornanni 30-it soraarsinneqarput.

Sullissinissamik isumaqatigiissut allanngortinneqarpoq, tassani Namminersorlutik Oqartussani angallassinermut isumaqatigiissutaa allanngortinneqarluni.

Namminersorlutik Oqartussanit Nunatta kujataani qulimiguulimmik angallassisarnermit angallatinik angallassisarnernut allanngortippaa, taamaattumillu timmisartuutileqatigiiffik sulisorineqartunik soraarsitsilluni.

Kommunabestyrelsemi ilaasortat akunnerminni isumaqatigiissutigisaannut ilaavoq Naalakkersuisut angallassinnermillu suliaqartut – sulilu isumaqatigiinniarfigineqartut - akornanni isumaqatigiinniarnerit naammassisimalerpata Kommune Kujallermiit oqaaseqaatissamik saqqummiussaqartoqarumaartoq.