alianartoq
Angallannermi ajutoorneq: Sikkilertoq ajunaarpoq
Nuummi aqqusinermi angallannermi alianartumi ajutoortoqarnera politiit suli paasiniarpaat
Arnaq 65-nik ukiulik ajunaarpoq Nuummi ataasinngornermi ualikkut aqqusinermi angallannermi ajutoortoqarmat Borgmester Anniitap Aqqusernani. Arnaq bussimit aportippoq. Qanorpiaq pisoqarsimanera politiit suli paasiniarpaat.
Nuummi politiit nalunaaqutaq 15.20 nalunaarfigineqarpoq aqqusinermi angallanermi ajutoortoqartoq ajutoornermilu bussi sikkilertorlu akuusut. Arnaq 65-nik ukiulik bussimit aporneqarpoq erngiinnarlu nakorsiartarfiliaanneqarluni.
- Arnaq nakorsiartarfimmut apuunneqarnermini toqusutut nalunaarutigineqarpoq, Nuup politiivi pigaartuusoq Inuk Lundblad nalunaarpoq.
Arnap ilaqutai politiinit kalerrinneqareerput. Ajutoornermili qanorpiaq pisoqarsimanersoq suli paasiniarneqarpoq. Taamaammat ajutoorneq qanoq pisimanersoq pillugu politiit oqaaseqarsinnaanngikkallarput.
- Ajutoornermi takunnissimasut suli apersorneqarput qanorpiaq pisoqarsimanera qulaajarniarlugu, Inuk Lundblad oqarpoq.
Ajutoornerup kinguninnguaq Qinngutta aamma naluttarfiup Maliup eqqaani kaajagissap akornanni aqqusineq politiit matugallarpaat. Ataasinngornerulli ualilluarnerani aqqusineq ammaqqinneqarpoq.