ingerlatsiviit utaqqipput
Angallanneq isumaginiarlugu Qujaukitsoq neriorsuivoq
Angallassinermi kiffartuussinermik isumaqatigiissutit piffissami qaninnerpaami iluarsineqassapput. Inuussutissarsiornermut Naalakkersuisup, nunat avannarliit takornariaqarnermik nittarsaaneranni peqataareerluni, tassa neriorsuutaasa ilaat
Inuussutissarsiornermut Naalakkersuisoq Vittus Qujaukitsoq (S), Tórshavnimi Vestnorden Travel Martimi peqataareerluni maanna angerlarpoq.
Taanna takornariartitsinermik ingerlatsivinnut neriorsuutissaqarpoq, tamakkua piffissami sivisuumi Kalaallit Nunaanni angalanernik tuniniaasarusukkaluarlutik tamanna piuminaatsissimammassuk, kiffartuussinissamik isumaqatigiissutit sivitsorneqarnissaasa paamaarunneqarnerat pissutigalugu.
– Angallannermi kiffartuussinissamik isumaqatigiissuteqannginnera pissutigalugu aappaagumut angallassinissamik pilersaarutit ilisimanagit, Kalaallit Nunaata nittarsaatiginiarnerani unammilligassat tusarsimavakka. Angerlaruma tamassuma sammineqarneqarnerulernissaa isumagissavara, Qujaukitsoq neriorsuivoq.
Takornariaqarnermik nittarsaassinermi Kalaallit Nunaannit peqataalluartoqarpoq, naalakkersuisunullu ilaasortaq naapertorlugu nunatsinni sumiiffinni arlalinni takornariartitsisartut aasaq manna ulapissimallutik siuariarsimallutillu nalunaartarsimapput.
– Angallatileruttornerup nalaani siuariartoqarsimaneranik nalunaaruterpassuit soorunami nuannaarutigaakka. Aammattaarli nunatsinni takornariartitsisartut unammilligassarpassuaqartut maluginiarsimavara.
Taanna Naalakkersuisooqatigiillu angallannermut takornariaqarnermullu ataatsimut periusissamik saqqummiussissamaarput, naggataatigut timmisartumi billetsit akikinnerulernernissaannik kinguneqartussamik.
– Nuna tamakkerlugu takornariaqarnermut periusissap nutaap, 2016-imiit 2020-mut atuuttussap, suliarineqarnera Naalakkersuisut aallartissimavaat, taannalu ukiaru tusarniaavigineqassaaq. Ingerlatsisut atuisartullu tikinnissinnaanerup pitsanngorsarneqarnissaa ujartorpaat, taamaattumillu mittarffeqarfeqarnerup aaqqissuussaanera misissortissimavara, takornariaqarnermut iluaqutaasinnaasut sammitillugit.
– Misissuinerup takutissimavaa assersuutigalugu Ilulissani Nuummilu mittarfiit allineqarpata Københavnimit billetsit akii 30 procentit angullugit appartinneqarsinnaasut, Vittus Qujaukitsoq oqarpoq.