kiffartuussineq
Angallammik angalagit kisianni qulimiguulimmut akiliillutit
Kujataani angalalluni qulimiguulimmit umiarsuartussanngortitaagaanni angalasussanngortitaagaanni akikilliisoqarneq ajorpoq
Naak qulimiguulimmik angalaniartilluni umiarsuarmik angalasussanngortinneqaraanni qulimiguulimmut bilitsi tamarmi akiliutigineqartarpoq.
Angallannermi kiffartuussinermut isumaqatigiissutit januaarip aallaqqaataani atuutilersut taama malittarisassaqarput.
Vivian Motzfeldtip § 37 naapertorlugu apeqqutigisaani paasissutissat takuneqarsinnaapput.
Tassani attaveqarnermut naalakkersuisoq, Múte Bourup Egede (IA), qulimiguulik timmisinnaanngippat umiarsuarmik angalasariaqaleraanni akiliut tamakkiisuussasoq ilisimatitsivoq.
- Angallat pilersaarutaasoq atorlugu angalanissaq pilersaarutaasoq naammassineqarsinnaatinnagu, angallammut allamut nuutsitsinissamik neqerooruteqartoqarsinnaasoq sullissisumut isumaqatigiissutigineqarpoq, taanna akissuteqarnermini allappoq.
Umiarsuarnermi mittarfimmut akileraarut akilerneqartartoq
Kisianni akikillileruteqarneq ajorpoq.
- Tamatumunnga atatillugu sullissisumut isumaqatigiissutigineqarpoq, angallatit akiisa assigiingissutigisinnaasaannik, taamatullu mittarfinnut akitsuutinik utertitsisoqartassanngitsoq, tassani atuarneqarsinnaavoq.
Kajumissutsimik utaqqineq
Ilaasut umiarsuartussanngortinneqarnertik nammineerlutik toqqanngiinnarsinnaagaat Múte Bourup Egede nangilluni allappoq. Utaqqisariaqassappulli.
- Kisiannili tamanna ilaasussap nammineerluni qinigassaraa, ilaasussap angallammut allamut nuutsinneqarusunnerluni, taamaalillunilu angalanissap pilersaarutaasup naammassinissaanut periarfissaqarusunnerluni, imaluunniit ilaasussaq angallammi pilersaarutaasumi aallarfissamut inissaqartitsiviusumut tullermut nuunneqarusunnerluni nammineerluni aalajangertussaammagu, akissummi allaqqavoq.