Angallanneq
Angalasut: Naammagilerparput
Kujataani attaveqarneq Kommune Kujallermi sulisut arfinillit, Sisimiunut pikkorissaariarniaraluarlutik aappassaa uniinnartut, naammagilivippaat. Sermitsiaq taama allappoq.
Kommune Kujallermi atorfillit arfinillit Kujataani innarluutilinnik aaqqissuussamik sullissinermut Sisimiuni pikkorissarnissamut peqataasussaagaluarput. Pikkorissarneq Innarluutillit pillugit qitiusumik ilisimasanik katersuiviup, IPIS-ip, aaqqissuussaraa atorfillillu taakku arfinillit qilanaarisimagaluaqalugu.
Apriilip 24-anni Qaqortumiit Narsarsuarmut angallammik ingerlasussaagaluarput Sisimiunullu ulloq taanna timmisartorlutik apuuttussaagaluarlutik. Anorersuartoq makissimalersut Disko Linemit sianerfigineqarput nalunaarfigineqarlutik Targap ilaaffissaraluata anorersuarmi ingerlasinnaannginnera pillugu Aviaq Ittummut ilaaginnarumaartut.
Qaqortumiit aallarput Narsamilu ilaasussanik ikisoqartussaammat aqqusaartussaallugit. Ingerlaarnerat, Narsarsuup qanilliartulernissaata tungaanut, ajunngilaq, taqqamanili mallit meterit sisamat tallimallu akornanni portutigipput.
Piffissarli eqqorlugu Narsarsuarmut pipput pilersaarutillu malillugit avannamut ingerlaqqinnissartik naatsorsuutigalugu.
– Mittarfimmut pigatta paasivarput Dash 8-t angalanissaat tamarmik unitsinneqarsimasut aatsaallu aqaguani ualikkut sisamanut ingerlaqqissinnaalluta paasillugu. Ullut marluk qaangiuttullu Sisimiunut ingerlaqqittussaavugut taamaasineranili pikkorissarnerup ilaa naammassereersimasussaalluni, taakku Sermitsiamut oqaluttuarput.
- Air Greenlandip timmisartuata ingerlaarnissaa taamaatitsiinnarsimanersorluunniit Disko Linep paasiniarsimanngilaa ingerlaqqissinnaanersugullu paaseqqaarnagu Narsarsualiaatiinnarluta.
Pikkorissarnissaat taamaatiinnarneqarpoq Narsarsuarmiillu illoqarfimminnut Qaqortumut, Narsamut Nanortalimmullu utiinnartariaqalerlutik.
Kingona inuit taakku pikkorissartinneqarnissaannik neqeroorfigiteqqipput, tassanili aamma pikkorissarfissaminnut apuussinnaasimanngillat.
Sermitsiap angallannermi ajornartorsiutit pillugit sammisaqarpoq. Aviisi uani pisiariuk: