silaannakkut angallaneq
Angalasut eqaarsaartarfimmi unnuisariaqarsimapput
Kitaani pujornera pissutaalluni timmisartuussinissat arlallit taamaannerinut pissutaavoq
Angalasut 75-it marlunngormat Kangerlussuarmiit aallanngitsoorput.
Pujornerujussua timmisartuussinissanik taamaatitsinermut pissutaavoq, taamaammaat Nuummut, Maniitsumut, Sisimiunut Aasiannullu angalasussaangaluit Kangerlussuarmi unnuisariaqarlutik.
- Kangerlussuarmi ulapaarfiuvoq. Unnuiffiusinnaasut tamarmik ulikkaavissimapput, taamaammat angalasut Kangerlussuup eqaarsaartarfiani unnuisariaqarsimapput, Air Greenlandimi attaveqatigiinnermut pisortaq, Katrine Hjelholt Nathanielsen, Sermitsiaq.AG-mut oqaluttuarpoq.
Suli pujornera pissutaalluni angalasut ullumi sisamanngornermi tamarmik apuuffissaminnut apuuussinnaanerat qularnarpoq.
- Ullormut pilersaarutigut naammassisinnaanerigut silap aalajangertuaannarpaa, taanna oqarpoq.