Angalasoq kamattoq: Assigiinngitsumik sullissineq unittariaqalerpoq!

Aasap ingerlanerani Narsarsuarmiit Københavnimut timmisartuussinerit taamaatinneqartarsimapput, tamatuma malitsingisaanik angalasut ullut pingasut qaaniunnerini aatsaat Danmarkimut ingerlaqqittarput. "Assigiinngitsumik sullissineq kanngunaqaaq", angalasoq isumaqarpoq.

Jacob Abelsen Qaqortuminngaanneersup Air Greenland kamaqarfigaa, taanna isumaqarpoq Nuummiit angalasut salliutinneqartartut. Pisuutitsineq Air Greenlandip ilumuunnginnerarpaa.

- Pingasunngormalli Narsarsuarmiit Danmarkimut ingerlaniartut suli ullumi tallimanngornermi Narsarsuarmi saperngutinneqarput. Aatsaallunngooq unnugu Nuummut ingerlanneqartussanngorlugit. Arfininngorpallu aatsaat Nuummiit Kangerlussuaq aqqusaarlugu Københavnimut ingerlaqqittussanngorlugit, Jacob Abelsen paasissutissiivoq erseqqissaallunilu:

Akuersaarneqarsinnaanngilluinnartoq

- Tamanna akuersaarneqarsinnaanngilluinnarpoq. Ulluni pingasuni kinguaattooqattaarneq.

Taassuma paasissutissiaraa, Kutaajaa ullumi ippassarlu sisamanngornermi sila aliaanaattoq. Taassuma oqariartuutigaa, utaqqineq Air Greenlandimit pinngitsoortinneqarsinnaangaluartoq, tassaniillunilu assigiinngitsumik sullissineq.

- Assigiinngitsumik sullissineq kanngunaqaaq. Pissutsillu taammaannerat akuersaaginnassavarput, taanna aperivoq.

Isornartorsiuinermut akissut

Isornartorsiut Air Greenlandimut ingerlateqqinneqarsimavoq imatullu Sermitsiaq.AG-mut akissuteqarluni:

- Kujataaani pingasunngornermi sisamanngornermilu timmisartuussinissat pilersaarusiungaapput, taamaattoq timmisartuussisoqarsinnaasimanani. Ippassaq tamanna Kitaanut tamarmut atuuppoq. Timmisartullu sumiinneri aamma pujornera pissutigalugu timmisartumik Narsarsualiartoqarsinnaasimanngilaq. Taamaammallu angalasut Kangerlussualiaassinnaasimanatigit. Sisamanngormallu timmisartorsuaq nal. 22.55-imut kinguartipparput, neriuutigalugu angalasut pineqartut ilaatinneqarnissaat.

Pissutaasoq

Kinguaattooqqanermut pissutsit pillugit Air Greenland nassuiaavoq:

- Angalasut kinguaattooqqasut ullumi timmisartorsarmut ilaasinnaannginnerat timmisartup ulikkaaqqarneranik pissuteqarpoq. Ullormut pilersaarutit ingerlanneqarnissaat salliutittarparput, tassanngaanniillu angalasut kinguaattooqqasut aatsaat sullitilertarlugit tamannalu amerlasuunit iluaangineqartarpoq. Kalaallit Nunaannukartussamillu immikkut attartorniaraluaratta iluatitsinngitsoorpugut.

Angalasut 167-it eqqorneqartut

Air Greenlandip paasissutissiaraa kinguaattooruteqarnerit angalasunut 167-inut eqquisimasoq.

- Taassuma saniatigut ullumikkut timmisartuussinissat kinguaattooruteqarfiupput, angalasullu ippassaq kinguaattoorsimasut amerlanersaat apuuffissaannut apuunniarsarivagut. Angalasut 167-it kinguaattooqqasut ingerlaqqinnissaat sulissutigaarput. Angalasut apuunnissaat anguniarlugu immikkut timmisartuliisaqattaarpugut, taamaattoq angalasut pineqartut kingulliit sapaatiuppat apuunneqarnissaat naatsorsuutigaarput, Air Greenland paasissutissiivoq.

Powered by Labrador CMS