Angalaneq taamaatinneqartoq: Timersortartut 150 kilomterimut qamuteralattariaqartut
Qulimiguulimmik angalanerit taamaatinneqarnerisa kingunerisaanik Arctic Winter Gamesimut peqataasussat Qasigiannguaniit Aasiannut navianartumik qamuteralattariaqarput
Ajaaja Jeremiassen aamma Tupaarnaq Z. Lundblad Qasigiannguaneersut navianartumik angallanneqassapput. Taakku Arctic Winter Gamesimut peqataasussatut toqqarneqarsimapput, peqataasussallu allat aqagu tallimanngornermi Kangerlussuarmiit Canadamut angalaqatigissavaat.
Volleyball-ertartut marluk ullumi Qasigiannguaniit Aasiannut qulimiguulimmik angalasussaangaluarput, angalanissaalli taamaatinneqarsimavoq. Taamaammat aqagu timmisartoq angumeriniassangunikku, 150 kilometerimut isorartutigisumut qamuteralalluni Aasiannukarnissaq aqqutissatuaalersimavoq.
Pitsaanerpaanngitsoq
- Aasiannut ingerlaarneq akunnerit pingasut missaanniissaaq. Taamaaliortoqartariaqarnera pitsaanerpaanngilluinnarpoq. Kisianni Ajaajap Arctic Winter Gamesimut peqataaniassanguni tamanna periarfissatuaraa. Aataata aanaatalu qamuteralallutik taakku marluk Aasiannukaatissavaat, Ajaaja Jerimiassenimut ataataasoq, Sermitsiaq.AG-mut oqaluttuarpoq.
Sermitsiaq.AG aamma paasitinneqarpoq, isikkamik arsaattartut Qasigiannguaneersut pingasunngormat aqqut taanna ingerlavigisimagaat.
Ersernerluttoq
- Qasigiannguani massakkut ersernerluppoq. Soorunami assut ernumanarpoq, kisianni ippassaq aqqut taanna aqqutigineqarmat ajoratik apuupput. Nittaassimammalli aqqutaat ersingunnaarsimapput, Kristian Jerimiassen oqarpoq.
Volleyball-ertartut Aasiannut apuutissagunik unnueqqaartariaqarput, tallimanngornermilu Kangerlussuarmiit Yellowknifemut ingerlaqqissallutik.