nunatsinnit
Angalaartut ajornartoortut Kim Kielsenip ikiorai
Naalakkersuisut siulittaasuat Savalimmiunilu politikerit marluk aportoqarnerata kingorna ikiuipput
Aasiaat Radio nalunaaqutaq 12.30 missaani ajornartoortunik nalunaarfigineqarnerata kingorna, politiit aamma Issittumi Sakkutooqarfik ataasinngornermi annaassiniaanermut peqataapput. Tassani Naalakkersuisut siulittaasuat politikerillu Savalimmiuneersut marluk ikiuuttut ilagaat.
Ikerasassuaq
Annaassiniarneq Qeqartarsuatsiaap qanittuani Ikerassassuup eqqaani pivoq, tassani angallat anginngitsoq kivisimavoq, kisianni taakku ajornartoortut ajoquteqanngillat, politiit ilisimatitsipput.
Politiit naapertorlugit angallatit marluk piffimmiipput, Nordstar 37 aamma Riviera 925. Kisianni politiit naapertorlugit aportoqarnera sumik pissuteqarnersoq suli oqaatigiuminaappoq.
Angallatini pineqartuni katillugu inuit sisamaapput, angallatillu marluk sumiiffimmukarput ajornartoortut ikioriartorlugit.
Kielsen ikiuuttoq
Savalimmiormiut partiianni Folkflokkenimi siulittaasoq, aamma Lagtingimi ilaasortaq Jørgen Niclasen, politikeri alla Magni Laksafoss Sambanspartietimeersoq angallammut ajutoortumut aportoqareersorlu apuupput.
- Kim Kielsen sioqqutilaarluta angallamminik apuussimavoq. Taamaalinerani angallat ataaseq kivereersimavoq, allalu putusimalluni. Kim Kielsenip inuttat angallamminut ikaartippai. Ikioqatigiillutalu ulissuarmik immakkiartornera annikillisinniarsaraarput, aamma imaarsaavugut, taamatullu angallat Nuummut kalillutigu, Jørgen Niclasen Sermitsiaq.AG-mut nassuiaavoq.
Tassuma ilanngullugu oqaatigaa, angallatit nalunaaqutaq 15.45 missaani sumiiffimmut apuussimasut.
Misissuisut
Tamatuma kingorna politiit misissuinertik aallartippaat.
- Pisumut tunngatillugu suli tamakkiisumik paasisaqanngilagut, misissuineq killisiuinerillu suli ingerlanneqarneri pissutaallutik, attaveqatigiinnermut tusagassiornermullu siunnersorti Henrik Madsen, Nunatsinni Politiineersoq ilisimatitsivoq.
Henrik Madsenip ilanngullugu oqaatigaa, sumiiffimmi tassani pujorsimasoq, kisianni apornermut tamanna apeqqutaanersoq oqaatigiuminaannerarpaa.
Nuummi saaffiginnittarfimmit politiit annaassiniarneq ataqatigiissaarpaat, sakkutuullu umiarsuaat Thetis aamma tassunga tunngatillugu nalunaarfigineqarpoq.
Sermitsiaq.AG-p Kim Kielsen apersorniarlugu attaveqarfiginiaraluarpaat, kisianni tamanna iluatsinngilaq