Angajoqqaatut akisussaasuunermut suliani kisitsisit pigineqanngillat

Kalaallit Nunaanni Eqqartuussiviit angajoqqaat qimanneranni meeqqamut akisussaasuunerinut kisitsisit qitiusut ilisimatitsissutigisinnaanngilaat.

Demokraatit siulittaasortaavata Niels Thomsenip qanoq amerlatigisut ataatsimut angajoqqaatut akisussaasuuneq isumaqatigiissutigisarneraat imaluunniit anaanaasut ataataasulluunniit qanoq amerlatigisut angajoqqaatut akisussaasuutinneqalertarnersut apeqqutigaa.

Inatsisinik atuutsitsinermut Naalakkersuisup, Anthon Frederiksenip, apeqquteqaat akisinnaanngilaa. Taanna Kalaallit Nunaanni Eqqartuussivinnut innersuussivoq, ima akissuteqarput:

Suliassaavallaartoq

- Paasissutissat piumasarineqartut naniniarlugit eqqarfuussiviit tamarmik namminneerlutik suliat tigussaasut tamarluinnaasa misissuiffiginissaat pisariaqassaaq. Piffissartornartorujussuussaaq. massakkullu taanna piffissaq piginngilarput, tamanna ilisimatitsissutigineqarpoq.

Kisianni Kalaallit Nunaanni Eqqartuussiviit apeqquteqartoq ilumoornerarlugu, angajoqqaatut akisussaaffiup qanoq agguataarneqarneranik kisitsisit pisariaqarnerarpaat, akissummilu ima naggasiipput:

Maanna aallartinniartut

- Kisitsisitigulli paasissutissat soqutiginarmata piffissami ungasinnerusumi misissorumaarparput, Kalaallit Nunaanni Eqqartuussiviit akissuteqarput.

Powered by Labrador CMS