Angajoqqaat sulinngiffeqartarnerat Naalakkersuisut sivitsoriartuaartinniarpaat
Erninermut atatillugu angajooqaat sulinngiffeqartarnerat sapaatip-akunnerinik sisamanik sivitsorneqarnissaa akuerineqassanngilaq, tassanilu Naalakkersuisut partiimi tapertaasumit Demokraatinit sivitsuinissamik aalajangiiffissatut siunnersuutigineqartunik tamanik malinninnginnerannik takutitsisoqarpoq.
Peqqissutsimut, Isumaginninnermut Inatsisinillu Atuutsitsinermut Naalakkersuisumit, Doris J. Jensenip akissuteqaataani atuarneqarsinnaavoq, ‘’angajoqqaat sulinngiffeqartarnerisa annertusineqarnerata atulersikkiartuaarneqarnissaa Naalakkersuisut sulissutiginiarpaat’’.
Erninermut atatillugu aningaasaateqarfik siulliussaaq
Randi Vestergaard Evaldsenip Demokraatineersup angajoqqaat erninermut ataillugu sulinngiffeqartarnerat sapaatip-akunnerinik sisamanik sivitsorneqarnissaa kissaatiginikuuaa, kisianni erninermut atatillugu aningaasaateqarfimmik pilersitsinissaq alloriarnermi siulliussasoq, Doris J. Jensen isumaqarpoq.
- Naartunermut erninermullu atatillugu sulinngiffeqartarnermik aaqqissuussinerup ilusaata isiginiarneqarnissaa alloriarneruvoq tulleq, assersuutigalugu ilaannakortumik sulinngiffeqarsinnaanermik periarfissiinikkut sulinngiffeqarneq eqaannerusoq, sulinngiffeqarnerup unitsinneqarsinnaaneranik kingusinnerusukkullu aallarteqqissinnaaneranik periarfissat, Doris J. Jensenip ilaatigut tamakku taakkartorpai.
Aningaasalersorneqarnera misissorneqassaaq
Tamatuma aningaasalersorneqarnissaa misissuiffigeqqissaarneqartariaqartoq, taanna aamma innersuussivoq, apeqqullu aningaasanut inatsisissamut isumaqatiginninniarnerni ingerlasuni ataatsimut tulleriiaarinermut tunngatillugu qaqinneqartariaqartoq isumaqarluni.