sumiginnaaneq
Angajoqqaat aningaasarsigaangamik akisussaaffitsik iperartarpaat
Akissarsiffimmi qaammammut ataasiarluni oqartussat angajoqqaajusarput
Anaana ataatalu kaasarfiminni aningaasaateqaleraangamik, meeqqatillu nerisinnissaannit unnuakkullu sinitsinnissaannit allamik suliaqarusunnerugunik, taava Kommuneqarfik Sermersooq angajoqqaatut akisussaatissinnaalerpaat.
Kommunalbestyrelsimmi Tasiilami misiliutitut aaqqiissut ingerlateqqinniarlugu aalajangerput, tassani illoqarfiup timersortarfiini klubbiinilu sulisut akissarsiffimmi unnukkut unnuakkullu paarsinissamut neqerooruteqarput.
- Tasiilami meeqqanut inuusuttunullu tamanna nuannaarutissaavoq, Meeqqanut, Ilaqutariinnut Atuarfeqarnermullu Ataatsimiititami siulittaasoq, Poul Hansen (D) oqarpoq.
Tassami siornatigut illorfiup meerartai oqartussanit angerlarsimaffiup avataanut inissinneqartarput, akissarsiffimmi angajoqqaavisa annertuumik sumiginnaanerat pissutaalluni. Kisianni illoqarfimmi pisortat illuutaanni meeqqat illersorneqarnissaannik neqeroorfigineqarnerisigut taakku ikilisinneqarput.
- Suliniut ulloq manna tikillugu iluatsilluarpoq, inerneralu ersarilluinnarpoq – meeqqat pilertortumik angerlarsimaffiup avataanut inissinneqartartut ikileriarput, Poul Hansen (D) oqarpoq.
Atuaruk: ‘Taqqissuuserisut’ meeqqanik inuunerinnerulersitsiniarput
Maanna angajoqqaat kommunimut saaffiginnissinnaanngorput, meeqqatillu akissarsiffimmi klubbimi unnuinissaa isumaqatigiissutigalugu.
Illoqarfiup meerartaat unnulernerani pisariaqartillugu timersortarfiliarsinnaapput, tassanilu unnukkorsiorlutik. Tamatuma kingorna meeqqat assigiinngitsunik sammisaqarsinnaapput, soorlu assassorneq imaluunniit filmimik isiginnaarlutik.
- Aaqqissuussinerit pinaveersaartitsinernik kinguneqartitsipput illoqarfimmilu siuariartortitseruusaarsinnaallutik, ataatsimiititaliami siulittaasoq inerniliivoq.