angajoqqaarsiat
Angajoqqaarsiat pitsanngorsaavigineqanngitsut
Angajoqqaarsiat paaqqinninnermusianut aamma aningaasartuutit matussusernissaannut tunngatillugu pisariaqartumik paasitinneqarsimanngillat
Isumaginninnermut, ilaqutariinnut, naligiissitaanermut inatsisinillu atuutsitsinermut naalakkersuisup, Sara Olvsvigip, Inatsisartunut ilaasortamut Laura Táunâjimmut akissutaani tamanna atuarneqarsinnaavoq.
Tamatuma saniatigut nerisanut akiliutit kingullermik ulloq januaarip aallaqqaataanili 2009-imi qaffanneqarput. Naak atuisunut akit juuli 2000-miit juuli 2016-imut 48,7 procentimik qaffakkaluartut.
Nerisanut akiliutit, atisassarsiutit kaasarfimmiussallu akornanni agguaaneq aamma atuisunut akit qaffannerat maIillugu, atuisunut akit qaffannerata pissuseqataanik akigititat nalingi qaffassagaluarpata, ukiumut aningaasartuutaanerusut 3.087.326 koruuniussapput.
Tamanna piffissami aggersumi misissorneqarnissaat, Sara Olsvigip akissuteqarnermini ilisimatitsissutigaa.
- Meeqqat tapersersorneqarnissaannut inatsisissap nutaap, 2017-imi upernaakkut Inatsisartut ataatsimiinnissaanni saqqummiunneqartussatut naatsorsuutigineqartumi, angajoqqaarsianut tunngasunut ilitsersuutit suliarineqarumaartut, akissummi allappoq.
Nangillunilu:
- Angajoqqaarsianut tunngasunut alloriarneq tulleq tassaassaaq angajoqqaarsiat akissarsiaasa misissorneqarnissaat.
Kommunit 2015-imi angajoqqaarsianut nalinginnaasunut 21 millionit koruunit atorsimagaat, akissuteqaammi atuarneqarsinnaavoq.