aningaasanut inatsit 2018

Angajoqqaarsiat aningaasanut inatsimmi puiorneqartut

Naak Inatsisartut upernaaq ataatsimiinnermini angajoqqaarsiat ajunngitsorsiaasa qaammammut 8000 koruuninik qaffaavigineqarnissaat isumaqatigiissutigineqarsimangaluartoq, Aningaasaqarnermut Akileraartarnermullu Naalakkersuisoqarfiup siunertamut aningaasat ikitsuinnaat 2018-mut aningaasanut inatsisissami immikkoortissimavaat.

Martha Lund Olsen forstår ikke, hvorfor forslaget til ny finanslov ikke har taget højde for en beslutning, som et enstemmigt Inatsisartut stod bag i forårssamlingen om en forhøjelse af vederlag til plejefamilier.

Inatsisartuni Ilaqutariinnermut ataatsimiitaliami Siumumeersuq Laura Tauinajik siunnersuutaa suliarineqarmat angajoqqaarsiat ajunngitsorsiaat 1. januar 2018 atuutilertumik 8000 koruuninut qaffaanissaq aalajangiunneqarpoq. Ilaqutariinnermut ataatsimiititaliap innersuussutaa Inatsisartunit isumaqataaffigineqarluni taperserneqarpoq.

Aningaasanut inatsimmi 2 mio. kr. immikkoortinneqarsimasut.

Siunertamullu aningaasartuuteqarnerulernissaq 2018-mut aningaasanut inatsimmi naleqqusarneqarsimanngitsoq, maanna paasinarsivoq.

- Konto pingaarnermut matumunnga aningaasaliissutit 2018-imiit 2,0 mio. kr.-nik ilaneqarput. Aningaasat angajoqqaarsiat aningaasarsiaasa qaffanneqarnerisigut aningaasartuutaanerusussaajunnartunut atorneqassapput, aningaasanut inatsississatut siunnersuummi allassimavoq.

Aningaasallu naammaqqajanngitsut, Siumumiik Martha Lund Olsenip oqaatigaa. Taanna naliliivoq, qaammammut 8000 koruuninik qaffaaneq 15 – 20 million koruuninik aningaasartuuteqarnerunermik malitseqartussaangaluartoq.

Ukiuni 24-ni qaffariaat annikinnerpaaq

Qaffaaneq ukiuni kingullerni 24-ni qaammammut taamaallaat 1.022 koruuninik qaffaavigineqarsimammat qaffaaneq tulluartuutinneqarpoq.

- Inatsisartut aaliangersimasaat ajoraluartumik Naalakkersuisut malinniarpasinngilaat, tamanna assut uggornarpoq ilami meeqqat pitsaanerusumik ikiorsersinnaassagutsigit aamma ulluinnarni tunaartassaat nukittuut pisariaqartippagut, tassanilu angajoqqaarsiaasussat pitsaasunik atugassaqartinnissaat pisariaqarluinnarluinnarpoq, Martha Lund Olsen tusagassiuutinut nalunaarummi oqarpoq.

Aningaasanut inatsit isumaqatiginninniutigineqalerpat aningaasat 2 million koruuniniit upernaakkut ataatsimiinnermi innersuussutigineqartumut naleqqussarlugu qaffaasoqarnissaa, Martha Lund Olsenip neriuutigaa.

Meeqqat atugassarititaasut pitsaanerit

- Ukiuni aggersuni meeqqat pitsaanerusumik ikiorserneqalernissaat kissaatiginaqaaq, taamaattunmik suli
neriuutigaara angajoqqaarsiaasartut aningaasat tigusartagaat aaqqiivigineqarnissaat., Martha Lund Olsen oqarpoq.

Powered by Labrador CMS