Angajoqqaajulluartut Nuummi aamma sumiginnaasarput

Meeqqanik immikkut ittumik paarsisoqartalernissaa sapaatip akunnerata ingerlanerani oqallisaangaatsiarpoq. Soorlu Tasiilami akissarsisoqartillugu oqartussat meeqqat angerlarfissaqarnissaat isumagisaraat.

Tasiilamiinnaanngitsorli aamma Nuummi angajoqqaat akisussaaffimminnik ikiorneqartariaqartut paasinarsivoq.

Meeqqammi innajaartinneqarneq ajormata Kommuneqarfik Sermersuup angajoqqaajusut sapaatip akunnerinimi kingullerni ikiortariaqartarsimavai.

Inuusuttut ornittagaat, Nuummi inuusuttut siuarsartut (Nuuk Ungdom I Fremdrift) NUiF, ammasarnera unnuamut sivitsorneqarneratigut taavalu inuusuttut pillugit illoqarfimmi angalaartarpoq inuusuttuaqqallu attaveqarfiginiartarlugit.

- Suliniutit iluatsilluarput, Kommuneqarfik Sermersooq tusagassiutinut nalunaarummi allappoq.

Meeqqat 70-it missaanniittut NUiF-imut unnukkut takkuttarput, amerlanerit pitsaasumik angerlarsimaffeqartut.

Angajoqqaat meqqatik innajaartinnissaat akisussaaffigimmassuk aqaguanimi qasuersimallutik atuariartussammata kommuneqarfimmi sulisut innarfissaq nalleraangat meeqqat ilaat biiliullugit angerlaattarpaat angajoqqaajusullu akisussaaffiinik ilisimatittarlugit.

- Meeqqat innajaartarnissaat pingaartilluarparput. Meeqqallu innarfissaat nalleraangat angajoqqaat sianerfigisarpavut meeqqaminnik aalleqqullugit. Aaneqanngippatalu meeqqat NUiF-ip biiliinik angerlaattarlutigit angajoqqaallu angerlarsimasut oqaloqatigisarlutigit aqagukkut meeqqat atuariartornissaat pingaaruteqarmat meeqqami innajaartartinnissaat isumagilaartaqqullugu, Helene Broberg Berthelsen oqarpoq.

Suliniut aallartimmalli meeqqat pingasut ikiortariaqartut kommunimillu maannamut ikiorneqanngitsut naammattoorneqarsimapput.

- Meeqqat taakku inunnik isumaginnittunit manna sullinneqalerput, tusagassiuutinut nalunaarummi allapput.