Ane Lone Bagger avataanit ilanngutsinneqarpoq

Naalakkersuisut nikinnerat annertuvoq. Marluinnaat naalakkersuisuuffitik qimassanngilaat

Privatfoto

Walter Turnowsky

tallimann 05. okt 2018 10:45

Annonse

Ane Lone Baggerip ilanngunnerani nuna tamakkerlugu naalakkersuinikkut kiinnamik nutaamik ilannguttoqarpoq, tassami taanna Inatsisartunut ilaasortaanngilaq.

Taassumalu ingerlaannaq naalakkersuinikkut suliassaqarfiit annertuut akisussaaffigilerpai. Naalakkersuisoqatigiit isumaqatigiissuteqarnerattut ilinniartitaanermut, kultureqarnermut ilageeqarnermullu naalakkersuisutut, atuarfiit ilinniarfeqarfiillu aaqqissuuteqqinneqarnissaannut siuttuussaaq.

Tamatuma saniatigut aamma nunanut allanut tunngasunik suliassanik suliaqartassaaq. Issittup nunani tamalaani soqutigineqaleriartuinnarnerani suliassaq pingaarneruleraluttuinnassaaq. Aammattaaq Naalagaaffeqatigiinnermi Kalaallit Nunaata Savalimmiullu nunanut allanut politikkimi ersarinnerusumik sunniuteqarnissaannut sulissuteqartoqarpoq.

Kisianni Ane Lone Bagger ilisimaneqareerpoq. Siorna kommuninut qinersinermi Palle Jeremiassen qaangernissaanut taasinerit arfineq-marluinnaat amigaatigai, taamaalillunilu borgmesterinngorsinnaagaluarluni. Taamaammallu borgmesterip tulliatut siullertut atorfinippoq.

Naalakkersuisut nutaat

Siverth K. Heilmann, Atassut, Pinngortitamut, Avatangiisinut Ilisimatusarnermullu naalakkersuisoq.

Vittus Qujaukitsoq, Nunatta Qitornai, Aningaasaqarnermut Nunanilu Avannarlerni suleqatigiinnermut naalakkersuisoq.

Doris J. Jensen, Siumut, Peqqissutsimut, Isumaginninnermut Inatsisinullu atuutitsinermut naalakkersuisoq.

Simon Simonsen, Siumut, Angallannermut Ineqarnermullu naalakkersuisoq.

Ane Lone Bagger, Siumut, Ilinniartitaanermut, Kultureqarnermut Ilageeqarnermut Nunanullu allanut naalakkersuisoq.

Nikkulaat Jeremiassen, Siumut, Aalisarnermut, Piniarnermut Nunalerinermullu naalakkersuisoq.

Erik Jensen, Siumut, Aatsitassanut Suliffeqarnermullu naalakkersuisoq.

Aqqalu Jerimiassen, Atassut, Inuussutissarsiornermut Nukissiuuteqarnermullu naalakkersuisoq.

Ilaasortanngortut allat marluk nutaat nutaajuallaanngillat. Nikkulaat Jeremiassen aalisarnermut piniarnermut naalakkersuisunngoqqippoq. Taassuma nuna tamakkerlugu aalisarnermut inatsisip isumaqatigiissutiginissaa suliassarilerpaa. Atorfik taanna qinigaaffiup siuliani sivikitsumik atorfigaa.

Atassut naalakkersuisuuffimmik pissarseqqippoq, avatangiisinut aamma pinngortitamut naalakkersuisoqarfik Kim Kielsenimit partiip tiguaa, ilisimatusarnermullu ilisimatusarnermullu naalakkersuisoqarfik ilanngullugu.

Vittus Qujaukitsup Nunatta Qitornaaneersup aningaasaqarnermut naalakkersuisunngornissaa naatsorsuutigineqareerpoq.

Erik Jensen aalisarnermi aatsitassarsiornermut nuutsinneqarpoq. Taassuma aalisarnermut inatsit allanngortinnagu saqqummiuteqqinniarlugu nalunaarutigigamiuk, sakkortuumik isornartorsiorneqarnikuuvoq.

Doris J. Jensenip suliassaqarferujussuit marluk akisussaaffigilerpai, isumaginninnermut naalakkersuisoqarfik aamma peqqinnissamut naalakkersuisoqarfik, taakku siornatigut immikkoortinneqarsimagaluarput.

Nikinnermi sunnerneqanngitsutuat marluk tassaapput Aqqalu Jerimiassen (A), inuussutissarsiornermut nukissiornermullu naalakkersuisutut ingerlaqqittoq, Simon Simonsenilu (S) mittarliortiternissamut pilersaarutip naammassinissaanut periarfissaqalerpoq.

inuiagatigiit politikki