Ane Hansen qinerneqarnerpaavoq

Ane Hansen Inuit Ataqatigiinneersoq Qaasuitsoq Kujallermi 350-inik taaneqarluni qinerneqarnerpaavoq. Isumaqatiginninniarnermilu borgmesteritut toqqarneqassaguni Inatsisartuni ilaasortaajunnaassanerarpoq.

- Inuit ataasiakkaat sunniuteqaqataasinnaanerat nukittorsarneqassasoq eqqartungaatsiarnikuuara, taamatullu isumaginninneq pitsanngorsarnissaa. Taamatullu oqariartuuteqarninnit qinerneqarluarsimanera ilimagaara, Ane Hansen oqarpoq.

Naammagittarallartariaqarporli. Siumukkummi Atassut Demokraatilluunniit isumasiornermi suleqatigilissappassuk Inuit Ataqagiit amerlanerussuteqarunnaassapput. Ane Hansenilli partiimi marlunnik qinigaaffeqarnissamut akerliunerat malinniarpaa.

- Qaasuitsoq Kujallermi borgmesterinngussaguma Inatsisartuni ilaasortatut tunuassaanga. Borgmesteriuneq piffissaq tamakkerlugu suliffiuvoq suliassaqartorujussuullunilu, Ane Hansen oqarpoq.

Parteeqataa Peter Olsen Aasianni qinerneqarnerpaagaluarpoq Ane Hansenili illoqarfinni allani qinersiseqarnerulluni Qaasuitsoq Kujallermi taaneqarnerpaavoq. Peter Olsen 320-nim qinerneqarpoq.

- Taama qinerneqartiginera tupaallaatigaara. Ane Hansenilu borgmesterinngussagaluarpat tapersersorpara. Kommunalbestyrelsemut ilaasortaanerma saniartigut Inatsisartuni ilaasortaanera ingerlatiinnassavara. Soorlu qinersivimmi maanna naammassisumi taamaattunga, Peter Olsen oqarpoq.