kommunit avinneqarnerat

Ane Hansen: KANUKOKA-p ilaasortaarusunnersugut aperiinnarpaatigut

- Qaasuitsup Kommunianit ikaarsaariarnitsinni KANUKOKA amigaatigaarput. Siornatigut KANUKOKA siunnersuinissamik neqoroortaraluarpoq, kisianni ikaarsaariarnerup nalaani peqataanngilluinnarpoq, Kommune Qeqertalimmi borgmesterissaq Ane Hansen (IA) oqarpoq.

Kommende borgmester i Kommune Qeqertalik Ane Hansen forventer ikke, at den kommende kommune skal være en del af Kanukoka

- Qaasuitsup Kommunianit ikaarsaariarnermut atatillugu sulinermi KANUKOKA peqataasimagaluarpat uagutsinnut oqinnerusimassagaluarpoq.

Kommune Qeqertalimmi borgmesterissaq, Ane Hansen (IA), Sermitsiaq.AG-mut taama oqarpoq.

Kommune Qeqertalimmi ikaarsaariarnermut ataatsimiititaliaq, kommunit kattuffianni KANUKOKA-mi ilaasortanngussanerlutik, novembarip 28-anni aalajangiiffigissagaat taanna ilisimatitsivoq.

Atuaruk: IA aamma Siumut kommunit akornanni avissaartuunneq

Sulinermut peqataanngitsoq
Kisianni Kommune Qeqertalik kommunit kattuffiannut ilaanissaa Ane Hansenip naatsorsuutiginngilaa.

- Qaasuitsup Kommunianit ikaarsaariarnitsinni ikiorneqarnissatsinnik pisariaqartitsinikuuvugut. KANUKOKA-p kattuffimmut ilaasortanngussanersugut taamaallaat apeqquteqarfigaatigut. KANUKOKA siornatigut aalajaatsorujussuunikuugaluarpoq, maanna ajoraluartumik taamaakkunnaarnikuuvoq. Ikaarsaariarneq naligiinngitsumik pivoq, tassani arlaleriarluta Qaasuitsup Kommunia utaqqisariaqarsimavarput, tassanilu KANUKOKA akulerunneqarsimasinnaagaluarpoq, kisianni taama pisoqanngilaq, taanna oqarpoq.

Ilaasortaanissaq innersuussutinngilaa
Kommune Qeqertalik taamaattumik KANUKOKA-mut ilaasortanngornissaa naatsorsuutiginngilaa.

- KANUKOKA-mut ilaasortaanermut akiliutit kommunitsinni pitsaanerusumik atorsinnaavagut. KANUKOKA-mut ilaasortaanissarput innersuussutiginngilara, taanna erseqqissaavoq.

- Taava KANUKOKA avaqqullugu Kommune Qeqertalik qanoq suliniarpa?

- Politikkikkut ataqatigiissaarisunik pilersitsisoqarnikuuvoq, tassani Naalakkersuisunut ilaasortat aamma borgmesterit ukiumut marloriarlutik ataatsimiittarput. Kommuneqarfik Sermersooq aamma Naalakkersuisunut toqqaannartumik attaveqarput, tassanilu suliassamik isumaginninnermik sukkanerusumik suliarineqartarput. Taamaaliussaguttalu tamanna uanga iluaqutissatut isigaara, Ane Hansen akivoq.

Powered by Labrador CMS