Anders Brøns inuulluaqquneqarpoq
Polar Seafoodimi sulisut ilaqutaasullu Vodskov Kirkemi Anders Brøns pingasunngornermi ualikkut naggammik inuulluaqquaat.
Vodskov kirke ulikkaarluinnarneqarsimavoq, ilaqutaasut, Polar Seafoodimi Danmarkimi sulisut Nordjyllandimilu kalaallit arlallit, Polar Seafoodimik pilersitseqataasoq Anders Brøns eqqaaniarmassuk. Anders Brøns Aalborg talittarfiani sapaatip akunnera kingulleq ipilluni toquvoq.
Eqqaaniaaneq Vodskovimi ingerlanneqarpoq, allaffimmi suleqataasut 50-it ittuminnut naggammik inuulluaqqusinermi peqataasinnaaqqullugit. Oqaluffik 430-inik isersimasoqarsinnaasoq ulikkaarluinnarsimammat, oqaluffiup paarlersua ilanngullugu naalagiarnermi atorneqarpoq.
Angut sullarissoq
Oline Berthelsen oqalugiussereermat Rasmus Lyberthip Anders Brøns eqqaaniarlugu appippoq. Tusarnaartitsineq tussunngunarluinnarpoq. Lyberthip Uummatinni Asanninneqarpoq aamma Takuat Paninnguaq atormagit tusarnaartut qullipipput. Vodskov Kirkemi eqqaaniaaneq naggaserlugu ilaqutaasut qaninnerusut illerfik akiarlugu annippaat, ilisiartortullu qamutaannut ikillugu. Ilisineq Nuummi juullip ulluisa naggataavani ingerlanneqassaaq.
Persuarsiunngitsumik naapeqatigiinneq
Eqqaaniaasoqareermat Vodskovimi Polar Seafoodip allaffiani naapeqatigiinnissamut qaaqquneqarput. Suliffeqarfik kaffemik, viinninik tamulugassanillu sassaallerpoq, soorunamilu kalaallit raajaataannik pitsaasunik aamma sassaallerluni.