akitsuutit
Andap unammilligassaqassaqisoq naatsorsuutigaa
Aningaasaqarnermut Naalakkersuisup aaqqissuusseqqinnerit, pisariillisaanerit akitsuutillu amerlanerusut ingerlanniarpai, piffissaq qaninnerusoq isigalugu isertitat aningaasartuutillu oqimaaqatigiissinniarlugit
Inatsisartut ukiakkut ataatsimiittarneranni aalajangersimasumik oqaluuserineqartartut ilagaat ukiumut tullermut aningaasanut inatsisissatdut siunnersuut.
Aningaasaqarnermut Naalakkersuisup Anda Uldumip pingasunngormat siunnersuut saqqummiuppaa, tassuunalu ukiuni tulliuttuni ingerlatsinikkut sanaartornikkullu amigartooruteqariarluni, qinigaaffiup sinnerani ukiuni kingullerni marlunni sinneqartooruteqarniarpoq.
Siunnersuutikkut 2016-imi amigartoorutit 65 millioner koruuniussapput, 2017-imilu aamma taama amerlatigissallutik. 2018-imili 2019-imilu sinneqartooruteqartoqassasoq missingersuutigineqarpoq, taamaasilluni aningaasanut inatsisit 2016-imiit 2019-imut atuuttut ataatsinut katillugit 0,9 millioner koruuninik sinneqartooruteqarfiussallutik.
Anda Uldumip isertuutinngilaa Namminersorlutik Oqartussat aningaasaqarniarnerat tatineqartorujussuummat, isertitassatigut aningaasartuutitigullu annertuunik unammilligassaqarluni.
– Isertitassat eqqarsaatigalugi Thulemi sakkutooqarfiup kiffartuunneqarnissaanik isumaqatigiissummi pissutsit ilaat suli qulaajarneqarsimanngillat taamaattumillu suli nalorninartoqarluni, kiffartuussinissamik isumaqatigiissut maanna isumaqatigiissummik tigummittumik qaammatinik arfinilinnik sivitsorneqarallarneqaraluartoq. Aamma avaleraasartoorniarneq ukioq manna ingerlanerlussimavoq, pisat 2014-imut sanilliullugit ikinnerujussuullutik. Akerlianik raajanut siunnersuinerit kingulliit pissutigalugit naatsorsuutigineqarsinnaavoq 2016-imi raajartassiissutit 2015-imit amerlanerujumaartut, Anda Uldum oqarpoq.
Oqaluttuaq tamaat Sermitsiami nutaami atuaruk, taannalu pisiarisinnaavat uani: