Aningaasanut inatsit

Anda Uldum: Akitsuutit taamaatiinnanngilagut

Aningaasaqarnermut Naalakkersuisup neriuutigaa aningaasanut inatsisip isumaqatigiinniutigineqarnerani suut tamarmik suli isumaqatigiinniutigineqarsinnaasut

Aningaasaqarnermut Naalakkersuisoq Anda Uldum (D)

Avaleraasartoorniarnerup ajalusoornerata kingorna, aappaagumut aningaasanut inatsimmi millionillippassuit amigaataasut nassaariniarlugit Naalakkersuisut suut tamaasa atorlugit malartaaserput.

Sulilu sumilluunniit taamaatitsiinnartoqanngilaq, Naalakkersuisoqarfik nalunaarpoq. Anda Uldumip (D) akitsuutit qaffanneqarnissaannik siunnersuut, akerlilersorneqarsimasorujussuaq, suli aalajangiusimavaa.

– Naalakkersuisut sumilluunniit taamaatitsiinnanngillat, aningaasaqarnermut Naalakkersuisut Twitterikkut allappoq.

Periarfissanik suli ammasoqarpoq

Inatsisartut Aningaasaqarnermut Akileraarutinullu Ataatsimiititaliaat tullianik pingasunngorpat ataatsimiissaaq. Tassani ataatsimiinnerit sapaatip akunnikkaartumik ingerlanneqartassapput, ukiarli manna kingusinnerusukkut ataatsimiittarnerit akulikinnerulerumaarput.

Ataatsimiinnissani tamakkunani suli suut tamarmik oqaluuserineqartassapput, Uldumip naalakkersuisoqarfia nalunaarpoq, taassumalu Sermitsiaq.AG saaffigisimavaa, allaaserisaq akitsuutit ´taamaatiinnarneqartut´ naammagittaalliutigalugu.

– Akitsuutinut siunnersuut taamaatiinnarneqanngilaq. Taamatut allanneq eqqunngilaq. Akisuutit siullermeerneqarnissaat kinguartinneqarsimavoq, pissutigalugu akitsuutit aningaasanut inatsimmik isumaqatigiinniarnermi maanna ingerlasuni, ilaammata, Martin Christiansen, namminersorlutik oqartussani tusagassiisarnermik ataqatigiissaarisoq, e-mailikkut allappoq.

Politikkikkut akerlerineqaqisoq

Naalakkersuisut suli naatsorsuutigaat akitsuutinut tunngasut suli isumaqatigiinniuteqarsinnaasut.

Anda Uldumimili aporfissaqaqaaq, tassa Demokraatini, Siumukkunni Atassutikkulluni politikerit siuttuusut oqaatigereersimammassuk akitsuutinut tunngasoq akerleralugu.

Equngasumik eqquinissaa ernumagaat

Illlua'tungiliuttutulli amerlanernit ernumassutigineqarpoq akitsuutit inuinnarnik equngasumik eqquissasut aammalu inuussutissarsiornermut sunniutissasut.

Akitsuutit qaffanneqarnissaat sapaatip akunnerani kingullermi pingasunngornermi ima akerlerineqalertigaaq Anda Uldumip tamakkua oqaluuserinissaat isumaqatigiinniutiginissaallu kinguartittariaqarlugit, tamannalu tunniutiinnarnertut isigineqaraluarpoq.

Powered by Labrador CMS