Aningaasanut inatsit
Anda Uldum akissarsianik qaffaavallaarnianngilaq
Inatsisartuni aningaasanut inatsisissap siullermeerneqarnerani aningaasaqarnermut naalakkersuisup pisortani akissarsiat qaffappallaannginnissaat ilimasaarutigaa
- Namminersorlutik Oqartussat aningaasaqarnerat annertuumik qaffakkaluttuinnartumillu tatisimaneqarpoq. Isertitat aningaasartuutillu tungaasigut unammilligassat annertupput.
Aningaasaqarnermut naalakkersuisoq, Anda Uldum (D), aningaasanut inatsisissamut siullermeerinninnermi saqqummiussamini ullumi pisumi oqaaseqaatimini taama aallarniuteqarpoq.
Akissarsiat qaffappallaassanngillat
Aappaagumut raajartassat amerlineqaraluarpataluunniit, aammalu Inatsisartut sioqqutsilluni soraarnerutisiaqartunut aaqqissuusseqqikkaluarpataluunniit Nunatta isertitaqarneranut ajortumut iluaqutaavallaarnavianngillat.
Namminersorlutik Oqartussani aamma taassuma suliffeqarfiutaani akissarsiat qaffappallaannginnissaat pisariaqartoq, Anda Uldum allappoq, taassumalu inuuniarnermut akit qaffappata ilaqutariit aningaasaatikinnerulernerat kingunerisinnaagaa.
Atuaruk: Aningaasat nalikilleqqipput
Maanna unikaallattoqassaaq
- Piffissamut 2009-2016-imut aningaasanut inatsimmi akinik aningaasarsianillu iluarsiiniarluni aningaasaliissutitut akigititat atorneqarsimasut Naalagaaffimmit akinik aningaasarsianillu iluarsiiniarluni ataatsimoorussamik tapiissutini akigititanik atorneqartunit malunnartumik qaffasinnerusimanerat 2016-imut aningaasanut inatsisissatut siunnersuummut nalinginnaasumik oqaaseqaatini takuneqarsinnaavoq.
Assigiinngissut Naalakkersuisut iliuuseqarnissaanut ajornakusoornerulersitsisoq.
- Taamaattumik ukiuni tulliuttuni amerlasuuni illuatungeriinniit annertuumik manna tikillugu iliuuserineqartartuniit pisortat ingerlatsivianni sulisunut sulisoqarnikkut isumaqatigiissuteqartarnerni tunuarsimaartoqartariaqarnera pisariaqarpoq. Piviusumik aningaasarsianik qaffaassutigisinnaasatsinni tunngaviusussaq unaavoq, pisortat ingerlatsineranni tunisassiornerup annertusineqarsinnaanera. Annertunerusumik tunisassiorsinnaassuseqarneq suut tamaasa eqqarsaatigalugit aningaasarsiat annikinnerulernerannik kinguneqassaaq, aningaasaqarnermut naalakkersuisoq taama oqaaseqarpoq.
Atuaruk: Akissarsiaat 20 procentinik apparneqarput