fratrædelsesgodtgørelser
Anda Uldum: Ajunngitsorsiassaqartitsisarneq ajunngilaq
Pisortanik soraarsitsiortornerpassuit akileraartartunut akisusimapput. Kisianni Anda Uldummip ajunngitsorsiassanik tunniussisarnerit qanoq iliuuseqarfigisinnaannginnerarpai
7,6 millioner koruunit. Taama amerlatigut Namminersorlutik Oqartussat siorna marsimit pisortanik soraarsitsisaarnerminnut aningaasartuutigisimavaat. Kingulliulluni soraarsinneqartoq Naalakkersuisut siulittaasuata Naalakkersuisoqarfiani pisortaq, Svend Hardenberg, qaammatinut 18-inut ajunngittorsiassaminik tunineqarpoq, naak sivikitsuinnarmik atorfeqarsimagaluartoq.
Kisianni aningaasaqarnermut naalakkersuisup, Demokraatineersup Anda Uldummip, oqarnera naapertorlugu aningaasartuutaasartut politikkikkut qanoq iliuuseqarfigineqarsinnaanngillat.
- Kattuffinnut isumaqatigiissutaareersut uanga qanoq iliuuseqarfigisinnaanngilakka. Taamaattumik aamma atorfilittanut assigiinngitsunut ajunngittorsiassanut annertussusiliinerit oqaaseqarfigisinnaanngilakka. Aamma Namminersorlutik Oqartussani atorfeqartut atorfeqarnerminnut atugassarititaat pillugit oqaaseqarniannginnama, Anda Uldum Sermitsiaq.AG-mut oqarpoq.
Sulisut eqqortut sulilersikkusuppai
Taamaattumik Demokraatip taasssuma siumut isiginissaq perusunneruaa, tassalu Namminersorlutik Oqartussat qanoq iliorlutik sulisussanik eqqortumik toqqaasarsinnaanersut:
- Uannut pingaarneruvoq sulissarsiorsinnaanermut pitsaanerulernissarput, taamatullu aamma sulisooreersunik suliaminnut piginnaasaqartunut tigumminniinnartarnissarput. Taamaaliorsinnaavugut pitsaasumik atugassaqartitsinikkut, pitsaasumik suliffeqartitsiutigaluta soqutiginartunik suliassaqartitsinitsigut. Taamaattumik toqqaasarnerput pitsanngorsartariaqarparput.
Atuaruk: Ajunngitsorsiassiinerit utoqqalinersiaqarluartitsisinnaasut
Atuaruk: Namminersorlutik Oqartussani ajunngitsorsiassiisinnaanerit arlaqartut
Uldum: Piginnaasat sumiuunermit pingaarnerupput
Nutaanik atorfinitsisarnermut tunngatillugu apeqqut pingaaruteqartoq tassaavoq naalakkersuisup Naalakkersuisuutitaqartut Siumukkut ataavartumik kalaalinngorsaallutik ingerlatsinerat malinniarneraa. Kalaallinik salliutitsineq Anda Uldummimit tapersersorneqanngitsoq:
- Uannut aalajangiisuunngilaq inuit suminngaanniit aggerfeqarnerat. Kalaaleq atorfinitsinneqarpat ajunngilaq, kisianni uanga piginnaasai qiviartarpakka. Inuit apersorneq ajorpakka suminngaanneernersut, aamma atorfinitsinneqarnialeraangata.
Atuaruk: Naalakkersuisoqarfimmi pisortaasup atorfimminit tunuarnera paasiuminaatsinneqarpoq
Naalakkersuisut siulittaasuata Naalakkersuisoqarfiani pisortaq atorfinitsinneqarnialerpat suliassanut piareersarsimanissaq Anda Uldummip pingaarnerutinniarpaa:
- Ataatsimiisitaliamik naliliisussamik pilersitsisoqareerpoq, taakkualu innersuussuteqassapput. Taamaalilluta Naalakkersuisuni tunngavissalimmik paasitinneqarluta aalajangiisinnaavugut, uanilu aamma taamaalilluni piginnaasat aallaavigalugit toqqaasoqarsinnaavoq.
Anda Uldummip Naalakkersuisut siulittaasuata Naalakkersuisoqarfiani politikeriusimasumik atorfinitsisoqarsinnaanera mattukkusunngilaa. Piumasaqaatituaavormi pineqartup maanna politikeritut inissisimannginnissaa.