Aningaasanut inatsit
Anda aaqqissuusseqqinniarpoq
Aningaasaqarnermut naalakkersuisoq aaqqissuusseqqinnermut tapersersortissarsiorluni pingasoqiusamik oqaluuserisitsiniarpoq
Ataatsimiinneq siulleq pivoq aggustip 10-anni. Andreas Uldumilu sulisartoqarnermi illua'tungeriinnik - sulisartut kattuffiannik sulisitsisullu peqatigiiffiinik - kiisalu kommuneqarfiit kattuffiannik Kanukoka-mik oqaloqatiginnilernermini immikkoortunik arlalinnik oqaluuserisassaqartitsivoq.
Qitiusumik oqaluuserisassat tassaapput suliniutissat Kalaallit Nunaanni aaqqissuusseqqinnernik aallartitsisussat, tamakkulu aningaasarsiornikkut siuariartornermik pilersitsissapput, tamannalu peqatigalugu qulakkeerlugu siunissamissaaq atugarissaarnissamut akissaqartoqarnissaa.
Nunassittarnerup pissusia
Ataatsimiinnermi sammisassat arlallit sammineqarput, ilaatigut pisortat ingerlatsinerisa ilusilersorneqarnera annertussusaalu, ilinniagaqartitsinerup qaffassarnissaata pingaaruteqassusia, atugarissaarnermi aaqqissuusseqqinnissamik Naalakkersuisut nalunaarutaat kiisalu nunassittarnerup pissusianik aallarnisaataasumik oqaluuserinninnissaq, Namminersorlutik Oqartussat nalunaarput.
Naalakkersuisunut ilaasortap nalunaarutigaa oqallinneq tamaat aqunniarlugu, tamatumuunakkut qulakkeerumallugu isumaqatigiinniarnerni Naalakkersuisut peqataasullu allat akornanni toqqaannartumik ataqatigiissoqarnissaa.
Qalerallit akitsuuserlugit
Inuit Ataqatigiit siuttoralugit naalakkersuisooqatigiissimasut 2012-imi sulisartoqarnermi illua'tungeriinnik, aningaaserivinnik soraarnerussutisiaqalernissamullu aningaasaateqarfinnik pingasoqiusamik oqaloqatigiinnerit aallartippaat. Taamanikkullu peqataasut neriorsoqatigiipput akileraarutitigut, ineqarnikkut, soraarnerussutisiaqarnikkut isumaginninnikkullu allannguutissanik ingerlatsiniarniarlutik.
Taamanikkut oqaloqatigiinnerit kingunerisaannik atituumik isumaqatigiissutigineqarpoq avataani qaleralinniarnermi akitsuummik eqqussisoqassasoq, biilit oqimaassusaannut akitsuut allanngortinneqassasoq kiisalu akileraarutitigut nalikilliliisarnermut malittarisassat sakkortusineqassasut - inassuteqaatillu tamakkua ukioq taanna Inatsisartut ukiakkut ataaatsimiinneranni inatsisissatut siunnersuutigineqarput.
Taamanikkut annertuumik aaqqissuusseqqinnissat pineqanngillat. Akerlianilli inatsisissatut siunnersuutit pingasut takutippaat pingasoqiusamik oqaloqatigiinnertigut angusaqartoqarsinnaasoq.