Anaana ataatalu atuarfimmiitillugit meeqqat aallussinerusarput

Atuartut issilluarnerusut ilikkagaqartullu. Qeqqata Kommuniata ukiaq ilaqutariinnut klassit ingerlanneqarnerisa tamanna kinguneraa, tassani anaana ataatalu piffissap ilaani atuarfimmeeqataasarput.

Nunatsinni nunani allanilu periutsip iluaqutaanera takuneqarsinnaavoq, taannalu ukiaq Sisimiuni Maniitsumilu aallarrtinneqarpoq.

Meeqqat eqqissisimanerusut
Naatsumik oqaatigalugu angajoqqaat sapaatip-akunneranut marloriarlutik akunnerni sisamani meeqqat atuarfimmeeqatigisarpaat. Angajoqqaat tapersersoqatigiittarnissaat, aamma meeqqat peqatigalugit eqqissimanissaannik ilinniartitsisarnissaq eqqarsaataavoq.

Ilaqutariinnut klassit iluatsipput - aamma anaana ataatalu atuarfimmeeqataajunnaaraluartut.

- Ukiap ingerlanerani ilaqutariinnut klassi naammassisarput pillugu malitseqartitsilluta ataatsimeeqatigeeqqammerpugut, aammalu ilinniartitsisut allannguutaasut suli

malugisinnaavaat, atuartut eqqissisimanerulersimapput aallussinerulerlutillu, Sisimiuni ilaqutariinnut klassimi klasselære Astrid Jensen oqaluttuarpoq.

Ilaqutariit klassit allat aallartereersut
Ilaqutariinnut klassit aamma 'ilinniagassaqartarput', angajoqqaat taamaalillutik meeqqatik unnukkut nerinermi periutsinik, pisiniarfissuarmi akiliinissamut utaqqinermik, pinnguaatinik pinnguarnissamut utaqqinermik sungiusarnikkut, aammalu meeqqat imminnut qalleraallutik oqaluttannginnissaannik sungiusarnikkut tapersersorlugit.

- Ukioq kingulleq ilaqutariinnut klassi siulleq Maniitsumi aallartipparput, tassani ilaqutariit pingasut peqataallutik. Taanna tamatsinnut assut ilinniutaasimavoq, atuarfiup pisortaa Elna Heilmann oqarpoq.

- Aallartittussat tullii ilaqutariinnik sisamanik peqataasoqarluni aallartinneqassaaq. Ilaqutariinnut klassi ingerlannikuusarput pitsaasuunikuvoq assullu ingerlalluarluni, tassani unammillernarsinnaasut ataatsimoorluta kivitseqatigiiffigisarlugit.

Suliffinnit tapersersorneqartut
Ilaqutariinnut klassit ingerlasinnaaqqullugit, angajoqqaajusut suliffiannit paasinnittoqarnissaa pisariaqarsimavoq. Suliffeqarfiit amerlanertigut eqaatsumik suleqataallutik angajoqqaat sulinerup nalaani atuarfimmeeqataanissaannut periarfissippaat.

- Ilaqutariinnut klassit aallartisarneqarneranni pingaaruteqarsimavoq, angajoqqaajusut suliffeqarfiisa suliniut tapersersorsimammassuk aammalu inooqataanikkut akisussaaffimmik pimoorussilluni tigusinikkut, tamannalu amerlanerit periuserisimavaat. Atuarfinnut suliffeqarfiit ikittuinnaat suleqatiginissaat unammillernartuusimavoq aammalu tapersersorneqarneq tamakkiisuusimanani, Qeqqata Kommuniani Ilinniartitaanermut pisortaasut Annga Lynge aamma Anna Heilmann oqaluttuarput.

Kommunip atuarfiini pingasuni annerni ilinniartitsisut pisortallu ilaqutariinnut klassit ilinniarfiginiarlugit pikkorissarsimapput.