Skagenimi toqutsineq

Anaalerummik nukkassaatinillu toqutsineq killiligaanngitsumi paarnaarussaanermik kinguneqartoq

Angutit pingasut Skagenimi peqqarniitsumik toqutsinerminnut ukiuni 12-ini paarnaarussaasussatut eqqartuunneqarput, sisamaat killiligaanngitsumik tigummisassanngortinneqarluni.

Angut 42-nik ukiulik killiligaanngitsumik tigummineqartussanngorluni eqqartuunneqarpoq, pingasullu allat ukiuni 12-ini angummik kalaallimik 20-nik ukiulimmik toqutsinerminnut paarnaarussassanngortinneqarput. Angutip inuusuttup najugaani Skagenimi siorna pivoq.

Hjørringimi eqqartuussiviup ataasinngornermi eqqartuussut aalajangiuppaa, Nordjyske allappoq.

Angutit taakku sisamat angut inuusuttoq ilaatigut niaquatigut timaatigullu nukkassaatinik, anaalerummik, ipittaammik issiavimmillu annersarlugu toqunneranut eqqartuunneqarput.

Angutit aammattaaq 20-nik ukiulik tunuatigut igaffimmi savimmik, saveeqqamik qiuutinillu arlaleriarlugu kapisimavaat.

Persuttaanerup kinguneranik pineqartoq qaratsamigut aanaartoorlunilu niaqqumi saarngatigut kiisalu kiinnami saarngisigut innarlerneqarpoq. Annaassiniartartut inissiamut isermata taanna ilisimajunnaaqqavoq, kisianni ullut marluk qaangiummata aqqunartitersimanini toqqutigai.

Toqunneqartup angutit maanna eqqartuunneqarsimalersut ilaat ketaminimik siornatigut tunisisimanerani peqqarniitsumik toqutsinermut aallarniutaasoq, unnerluussissaatitaasut oqaatigaat.

/ritzau/

Powered by Labrador CMS