Tour de France
Ammaanersiornermi Sky saqquminerpaavoq Fuglsangilu nuimavallaarani
Geraint Thomas ajugaavoq, Chris Froomillu ilimagineqartut allat ajorsartillugit. Arfininngornermi enkeltstarternermi Sky ajugaallualaavippoq, Jakob Fuglsangilu sissuerluni aallartilluni.
Ukioq manna Tour de France ammaanersiorneqarnerani masarlussiorfiuvoq, aqqusernillu quasaqasut 14 kilometerimut isorartutigisumut enkeltstarternermi sangorissat pissaganartorsiortitsipput.
Geraint Thomas-ip ajugaaneratigut unammisartoqatigiit Sky ajugaallualaavipput, Chris Froome-lu unammilligassarinerpaasaminit piffissamik aallerluarpoq.
Taanna ukioq kingulleq Tour de France-mi ajugaasuusoq Nairo Quintanamit (Movistar), Richie Portemit (BMC), Alberto Contadorimit (Trek), Fabio Arumit (Astana) aamma Jakob Fuglsangimit (Astana) piffissaq minutsip affaa sinnerlugit aallaerfigai.
Sissuertut
- Ajugaaniarlunga ingerlaannginnama sissuerlunga ingerlaarnissara pingaartinnerusimava, Fuglsang oqarpoq.
- Apuuffissamulli ajorani apuunnissaq pingaarnersaavoq.
Taamaasilluni Fuglsang piffissaq eqqarsaatigalugu piukkunnaatillit allat peqatigai, kiisianni angorsarinnerussaarnerisinnaanini neriuutigisimaluarpaa.
Unammisartoqatiminit ajorsartinneqartoq
Ilaatigut taanna unammisartoqatigiit aqutsisuannit Fabio Aru-mit sekuntinik marlunnik ajorsartinneqarpoq, naak taassuma naliginnaasumik enkeltstarterneq pikkoriffigivallaanngikkaluaraa.
- Ajornaga apuuppunga, tamanna pingaarnerpaavoq. Soorunami sukkanerusumik ingerlaarnerusussimangaluarpunga. Misigissutsit ajorisassaanngillat, piffissarlu eqqarsaatigalugu nalorninarluni, Fuglsang inerniliivoq.
Ingerlaarfik 14 kilometerinut isorartutigisoq annerusumik unammilligassaqanngilaq. Sialliinnavinneratalu aqqusineq quasartippaa.
Sukkaniuttartoq Dylan Groenewege siullersaalluni aqqusinermi quasaqisumi ajutoortuuvoq.
Valverde peqataajunnaartoq
Amerlanerit allat assigalugit taanna makeqqippoq apuuffisamulli apuulluni, angutillu marluk sakkortuumik orlunertik pissutigalugu peqataasinnaajunnaartariaqarsimapput, peqataasinnaajunnaartulli aapparivaa Movistariminngaanneersoq Alejandro Valverde.
Spaniamiu misilittargartooq sakkortuumik orluvoq assiaqutsimullu sakkortuumik sisoorluni aporluni. Taanna tassani sivisuumik uninngavoq, sikkileqqinnanilu.
- Ajorpoq. Unammisartoqat taama ajutoortillugu nuannerneq ajorpoq. Assut ajuusaarnarpoq, tassungalu ajussaqaluni, Jakob Fuglsang oqarpoq.
- Soorunami unammisassat ikilipput, kisianni sikkilerlunga ajorsartikkusunnerungaluarpara.
Michael Valgren (Astana) aamma Lars Bak (Lotto Soudal) Fuglsangimit kingulliunerulaarlutik apuupput, taamaattoq Lars Bak-ip Tour de France-mi aallartinnini nuannaarutigeqaa.
- Pisinnaasara tamaat ingerlaarpunga. Ulluni pingasuni susaqarata uninngaarsimavugut, tamannalu sivisoqaaq, taamaammaat sukataagaatsiarsimavunga kiattaqaqaarli. Tamanna iluatsippara, 37-nik ukiulik Tour de Francemi misilittagartooq oqarpoq.
/ritzau/