Amigartoorujussuarneq: Aningaasaqarneq taamaammat taama inissisimavoq

Aningaasaqarnerup qanoq inissisimanera pillugu Inuit Ataqatigiinnit, Demokraatinut Sulisitsisut Peqatigiiffiatalu saqqummiunneqarnissaat piumasaqareersut aningaasaqarnermut naalakkersuisuugallartup Vittus Qujaukitsup, Siumumeersup, Kalaallit Nunaata 2014-mi aningaasaqarnera pillugu tusagassiutinut katersortitsinermini saqqummiuppaa Nuummi pingasunngormat.

Nunatta karsia 2014-mut 275 million koruuninik amigartooruteqarnissaa tassani saqqummiunneqarpoq.

Angusassatut naatsorsuutigisat minnerunngitsumik nunatsinni suliffissaaleqinerup annikillisarneqarnissaanik kissaateqarneq aallaavigalugu iluarsagassanik sanaartugassanillu siuartitsinermut atatillugu 174 million koruuninik ilassutitut aningaasaliissuteqarnermit sunnerneqarpoq, Aningaasaqarnermut Nunamullu Namminermut Naalakkersuisoqarfik nalunaaruteqarpoq.

Naatsorsuutigisamit allaanerusut
Tamatuma saniatigut isertitassatut naatsorsuutigisat naatsorsuutigisamit ikinnerungaatsiarneri missingersuutinik malittarinninnermi paasinarsivoq. Tamanna arlalinnik pissuteqarpoq. Tamanna aamma 'Missingersuutinik malittarinninneq Septemberi 2014'-mi atuarneqarsinnaavoq.

Akileraarutinit akitsuutiniillu isertitat missingersuutigisanit 100 million koruunit missaannik ikinnerussangatinneqarput. Inuiaqatigiinni aningaasaqarnerliuleriartorneq pissutaanerpaavoq, suliffissaaleqisoqarnerulernerata saniatigut akileraarutitigut isertitakinnerunermik nassataqartoq, innuttaasut atugassaminnut aningaasaatikinnerulerput tamatumalu nassatareqqillugu ass. Eqqussuinermut akitsuutinit naqissusiinermullu akitsuutinit isertitakinnerulerneq. Imigassamit tupamiillu isertitat ikilipput, missingersuutigisanit isertitakinnerussutaallutik, tamatuma saniatigut avaleraasartuunut akitsuutit missingersuutigisanit 20 million koruuninik ikinnerusunik isertitsissutaapput.

- Illuutinik Illuut A/S aqqutigalugu attartortitanik nutaajunerusunik tunisinermit iluanaarutissatut naatsorsuutigisat naatsorsuutigisanit ikinnerujussuupput, taamatullu aamma RAL-imit pissarsianit akiliutissatut missingersuutit piviusunngortinneqaratik. EU-mit suleqatigiinnissamik isumaqatigiissummit isertitat taamatuttaaq naatsorsuutigisamit ikinnerussapput, Naalakkersuisoqarfik nalunaarpoq.

Paasissutissanik isertuussiniartoqanngilaq
Nunatta karsiata 2014-mi 275 million koruunit sinnerlugit amigartooruteqarnissaa pillugu tusagassiortunik katersortitsinermi aningaasaqarnermut naalakkersuisuugallartoq, Vittus Qujaukitsoq, oqaaseqarfigaa. Amigartoorujussuarnissaq qinersisoqareernissaata tungaanut isertuussiniarsimanersoq Sermitsiaq.AG-mit aperineqarpoq

- Naamerluinnaq. Qineqqusaarpugut, angalasaqattaarpugut, taamaattumik aatsaat nalunaaruteqarpugut amigartooruteqarnissaq qanoq annertutigissanersoq, Vittus Qujaukitsoq Sermitsiaq.AG-mut oqarpoq.