Amerlanerusut kommuni maalaarutigisalerpaat

Innuttaasut 5.400-t.

Ukiuni arfinilinni kingullerni taama amerlatigisut siunnersuisarfik IKIU, inatsisitigut siunnersorneqarnissaminnut ilitsersuunneqarnissaminnullu saaffiginnittarsimapput.

Ukiormanna qaammatini arfineq-marlunni siullerni IKIU 700-nit saaffigineqarsimavoq, taakkulu ukiumut siulianut piffissami tassani 100-nik amerlanerupput.

- Innuttaasut kommunimut saaffiginnissimallutik itigartitaagaangamik tamanna naammattumik itisilerneqarsimanngitsutut misigisarnerat, imaluunniit aalajangiinermut toqqaannartumik isumaqataannginnerat, siunissamilu qanoq iliorsinnaanerminnut siunnersorneqarnissamik kissaateqartarnerat saaffiginninnermi amerlanertigut peqqutaasarpoq, allattoqarfimmi pisortaq, Sofia Rossen oqaluttuarpoq.

Taarsigassat pillugit saaffiginnittut ikinnerusut
IKIU-p 2015-imut naleqqiullugu maluginiarpaa, taarsiissuteqarnissamut apeqqutit, pisortani oqartussaasunut, kisiannili aamma taarsigassarsititsisartunut namminersortunut akiitsut taarsigassarsiallu pillugit saaffiginnissutit ikilisimasut.

Kisiannili ilaqutariinnermut inatsisinut apeqqutit, kiisalu pisortanit ikiorsiissutit ilitsersorneqarnissamillu saaffiginnissutit amerlisimapput. IKIU 2015-imi aamma 2016-imi innarluutilinnit inersimasunit pisinnaatitaaffiit pillugit saaffiginnissutinik ikittuinnarnik tigusaqarpoq, kisiannili angajoqqaanit innarluutilinnik meeralinnit saaffiginnissutinik amerlanerusunik tigusaqarluni.

Tamatumani pingaartumik meeqqap ikiorneqarnissaa, kiisalu najorteqartarnermut ikiorneqarnissaq pillugu kommunip itigartitsinera pineqartarpoq. Kiisalu kannguttaatsuliornerit pillugit suliat aammalu kingornussisarneq kingornussassiallu pillugit suliat amerlisimapput.

Pisinnaatitaaffinnik ilisimasaqarnerulerneq
Sofia Rossen isumaqarpoq, saaffiginnittartut amerlinerinut innuttaasut pisinnaatitaaffimminnik ilisimasaqarnerulernerat pissutaasoq.

- Sapinngisatsinnik pitsaanerpaamik siunnersorniartarpavut, kisiannili aamma misigisarparput, saaffiginnissutit amerlinerini innuttaasut pisinnaatitaaffimminnik ilisimasaqarnerulernersimanerat, taamaattumillu amerlanerusut siunnersorneqarniarlutik saaffiginnittartut takuneqarsinnaasoq.