Amerlanerusut akileraarutinut naatsorsuusiornissartik pinngitsoortalissavaat

Namminersortuuguit aamma 1 millionit koruunit ataallugit kaaviiaartitaqarpat, akileraarutitigut ukiumoortumik nalunaarusianik suliaqartariaarutissaatit. Siornatigut 400.000 koruunit killigitinneqarnikuugaluarput.

Akissuteqarnissamut killigititaq

Nalunaarutip nutaap ilaatigut tamakku allannguuteqarfigissavai. Nalunaarut maanna tusarniaassutigisassanngorlugu nassiunneqaqqammerpoq, decembarip 11-at akissuteqarnissamut killigitinneqarpoq.

Nalunaarut nutaaq aamma arlalinnik erseqqissaanernik aamma allannguutinik imaqarpoq, oqartussat tunisat allagartaannut aamma akileraarutitigut ukiumoortumik naatsorsuusiornermut sunik piumasaqaateqarnerat pineqarluni.

- Siunnersuut tamatuma saniatigut, akiligassiissummik, kredinotamik il.il. tunniussisoqartassasoq piumasaqaammik imaqarpoq aammalu taakkununnga ilusiliussassanut piumasaqaatinik aalajangersaaviulluni. Akiligassiissumik tunniussisoqarnissaanik piumasaqaat taamaattoq, nalinginnaasumik suliffeqarfinni inuussutissarsiummik ingerlataqartuni il.il. akileraarutitigut misissuinissamut pitsaanerusunik tunngavissaqarnissaq qulakkeerniarlugu pisariaqarpoq, nalunaarutip oqaaseqarfigineqarnerani tamanna atuarneqarsinnaavoq.

Paasissutissanik avitseqatigiinneq

Elektroniskiusumik paasissutissanik avitseqatigiittoqarnerulernissamik ineriartortoqarnera tapersersornissaa ilaatigut siunertarineqarpoq.

- Assersuutigalugu pisortanut elektroniskimik akiligassiisarnermik atuisarnerup kukkunerit pisinnaaneri annikillisissavaat aammalu pisortani suliassaqarfimmi sunniuteqarluarnerulersitseqataassalluni, tamanna allaqqavoq.

Naatsorsuutini allattueriaatsip atuutereersup atorneqarnerani, ilusiliussassanut piumasaqaatit tamarmik naammassineqarsinnaassasut Aningaasaqarnermut Naalakkersuisoqarfik naliliivoq.

Allannguutissarpassuit uani takukkit:Nalunaarut tusarniaatigineqartoq