Amerlanerussuteqartut nutaat, naalakkersuisut ikinnerussuteqartut imaluunniit qinersineq

Siumumik isumaqatiginninniarnerit Inuit Ataqatigiit unitsnnerisa kingorna periarfissat allattorsimaffiat imaappoq.

Inuit Ataqatigiit naalakkersuiosoqatigiinnik Siumumit siuttuuffigineqartumut ilaanissaminnut kissaatiginninnginnertik ullumi nalunaarutiginerisa kingorna, qanoq pisoqarnissaanik sisamanik periarfissaqarpoq.

1. Siumup Demokraatit isumaqatigiissuteqarfigalugit naalakkersuisoqatigilissavaat. Partiit taakku marluinnaat isumaqatigiissagunik ataatsimik amerlanerussuteqalissapput. Atassut aamma Nunatta Qitornai tassani naalakkersuisoqataaginnassagunik, taava sisamanik amerlanerussuteqarlualissapput.

2. Siumut ikinnerussuteqarluni naalakkersuisunngussaaq. Tamannali Demokraatit, Inuit Ataqatigiit imaluunnit Partii Naleqqap naalakkersuisut taamaattut tapersertariaqassavaat. Partii Naleqqap tunuarnerata kingorna tamanna ilimanaateqarpallaanngilaq. Sara Olsvigip ullumikkut nalunaarutaa Naalakkersuisunut Siumumit siuttuuffigineqartut tapersersornissaanut naaggaartutut isikkoqarput.

3. Qinersisoqassaaq. Taamaattorli Inatsisartuni amerlanerussuteqartut immikkut ittumik inatsisiliornermikkut siusinaarluni qinersinissaq aalajangiussinnaavaat. Kim Kielsenilli aalajangersinnaavaa: Inatsisartuni tatiginnikkunnaarluni taasititsinermi ajorsaruni Inatsisartut apereqqaarnagit qinersititsisinnaavoq.

4. Inuit Ataqatigiit siulittaasuata Sara Olsvigip allatut amerlanerussuteqartunik katersuutsitsineq iluatsissinnaavaa. Kisianni Demokraatit aamma Suleqatigiissitsisut isumaqatigigaluarunigilluunniit, ilaasortaq ataaseq 16-iunissamut amigaataassaaq, partiilu ataaseq ilaasariaqarluni. Kisianni amerlanerussuteqartut katersorneqaraluarpataluunniit iluatsiinnariaanngilaq. Tunngaviusumik Kim Kielsenip iliuuseqartussatut pisussaaffik tunniuteqqaartariaqassavaa. Taanna Naalakkersuisut siulittaasuattut tatiginnikkunnaarnermik taasititsisoqarneratigut peersinneqarsinnaavoq – taakkartorneqareersutullu qinersisoqarnissaanik aalajangiisinnaanngussalluni.

Pilersaarut malillugu ukiaanerani ataatsimiinneq tallimanngorpat aallartissaaq. Tamannalu aaqqiissuteqarnissamut periarfissaqartitserpianngilaq.

Powered by Labrador CMS