Københavnimi toqusoq
Ambulace siulleq ornigutsinneqarsimasussaagaluarpoq
Ambulancemut sianertoqarmat aatsaat minutsit 26-t qaangiummata tikiupput. Angut toqoreersoq ambulancet tikiupput
Kukkusoqarnera pissutaalluni angut 32-nik ukioqartoq Københavnimi toquvoq.
Ambulancet takkunniarnerat sivisuallaarujussuartoq oqaatigineqarpoq.
- Ambulancenut pingajussaa sianertoqarmat aatsaat paasineqarpoq pisoq ilungersunartuusoq. Siullermik sianertoqarmat angut imigassartorsimanersoq apersuutigineqarpoq, uummataa kassukkunnaarsimanersoq apeqqutigineqanngilaq, tamanna kukkuneruvoq, Region Hovedstadenimi pisortaq Freddy Lippert oqarpoq.
Maleruarneqartartut malinneqarsimanngitsut pingasunngormat nassuerutigineqarpoq.
- Siullermik ambulancenut sianertoqarmat ingerlaannaq ornigussimasussaagaluarput. Kukkuluttortoqarmat taamaasiortoqanngilaq. Paasinerluisoqarpoq qanoq una pilertortumik suliassaanersoq. Taamaattumik ambulancet siulliit takkutinngillat. Ukiumut 5000-teriarluta imigassartorsimasunit sianerfigineqartarpugut, amerlanerpaartaatigullu ikiugassaaneq ajorput ornigukkaangatta, Freddy Lippert oqarpoq.
Maleruarneqartartut allanngortinneqarnissaat sulissutigineqalerpoq assingusumik pisoqaqqinnginnissaa anguniarlugu.
- Inuttut kukkusoqarsinnaajuaannarpoq. Sulisugulli sapinngisartik tamaat sulisarput. Sianertoqaraangat qanoq oqaluussisoqartalernissaa maannakkut allanngortinniarparput.
- Taamaattumik sianertoqaraangat allaanerusumik nalilersuisalissaagut pitsaanerusoq anguniarniarlugu, Freddy Lippert oqarpoq.