Aluu Airlines

Aluu Airlines kukkussuteqalaareersoq: Inniminniinerit ajornartorsiutigineqarsinnaapput

Sermitsiaq.AG-mit saaffigineqareernermit Aluu Airlinesimit oqaatigineqarpoq timmisartuutileqatigiiffik aktieselskabiunngitsoq. Tamanna siunissami inniminniisarnernut ajornartorsiortitsisinnaavoq

- Aluu Airlinesi CVR-imut aamma Erhvervsstyrelsenimut ilaasortaanngikkaluartoq timmisartuutileqatigiiffimmi siulersuisuni siulittaasoq Chief Commercial Officeritut imminut taasoq?

Greenland Express Airip Aluu Airlinesimut Facebookikkut tikilluaqqusinermini Greenland Express Airip pisortaaneq Gert Brask allappoq.

Aluu Airlinesip timmisartuutileqatigiiffinnut unammillerniarluni sapaatip akunnerata siuliani nalunaaruteqarpoq. Danmarkimut angallassisalernissat kiisalu nunatta iluani aamma angallassisalernissat pilersaarutigineqarput. Akigitinneqartussatut siunnerfigisat Air Greenlandimit Greenland Express Airimiillu akikinnerujussuupput.

Air Greenlandimi timmisartortartuusimasip Pele Brobergip Aluu Airlinesimik piginnittuusup, timmisartuutileqatigiiffiup aallartinnginnerani ajornartorsiuteqalerpoq. Sermitsiaq.AG-ip saaffiginninnerani Pele Broberg oqarpoq Greenland Express Airimit oqaatigineqartut eqqortuusut.

Inniminniinerit ajornartorsiutaalersinnaasut
Aluu Airlines tusagassiutinut nalunaaruteqarpoq sisamanngormat, tassani aktieselskabitut imminut taasimaneq kukkunerusoq oqaatigineqarpoq:

- Sapaatip akunnerani uani suliaqartorujussuuvugut. Suliffeqarfittut Aluu Airlinesip kukkusumik saqqummiupparput. Erhverstyrelsenimit CVR-imik akuerisaasumik tunineqaqqaartinnata suliffeqarfik aktieselskabitut taaneqarsinnaanngilaq, kisimilu 'aallartisartutut' taaneqarsinnaalluni.

Tamannalu siunissami inniminniinernut ajornartorsiulersitsisinnaasoq oqaatigineqarpoq.

- Erhvervsstyrelsenimut decembarip 27-ani qinnuteqaaterput utaqqimaarparput. Aktiatileqatigiiffittut ingerlatsinissarput suli naatsorsuutigaarput. Inniminniinernut ajornartorsiulersitsisinnaavoq kukkuluttornivut siulliit.

Aluu Airlinesip Facebookimi quppernerani aktieselskabitut allaqqagunnaarluni suliffeqarfittut aallartisartutut allaqqalerpoq.

Powered by Labrador CMS