Skip to main content

Alternativetip namminiilivinnissaq tapersersorpaa

Alternativet Nunatta namminiilivikkiartornerani tapersersuiniarpoq naalagaaffeqatigiinnerlu kajumissutsimik isumaqatigiissummik taarserniarlugu

Kalaallit Nunaata maanna tunngaviusumik inatsisip ataani inissisimanerata kajumissutsimik isumaqatigiissummik taarserneqarnissaanut partiip Alternativetip maanna taperserlugu ersarissumik oqariartutigaa – nunami innuttaasut tamanna tapersissappassuk.

- Naalagaaffeqatigiinnerup free-associationimut allanngortinnissaanut kalaallinit kissaatigineqarpat, taava tamanna paatsuugassaanngitsumik tapersissavarput, partiip oqaaseqartartua, Roger Courage Matthisen, Sermitsiaq.AG-mut taama oqarpoq.

 

Partii taamaalilluni namminiilivinnissamik anguniagaqavissortut, kisianni aamma naalagaaffeqatigiinnermik illersuisut soorlu kontradmiralip Niels Wangip aamma diplomatip Niels Taksøe-Jensenip eqqarsaatigisimasaannut inissipput.

Naalagaaffimmit tapiissutinik killilersorneqassanngitsut

Danskit partiivi allat piffissap ilaani kalaallit innuttaasut oqaluttuuttarpaat namminiilivinnissaq aningaaqarnikkut periarfissaanngitsoq, tamanna oqallinneq mumisinneqartariaqartoq, Roger Courage Matthisen oqarpoq.

- Takorluukkat ineriartortinneqaraangata, pisarisaqartitsinermitpolitikkimit killilersuisoqassanngitsoq tunngaviusumik isumaqarpugut. Kalaallit nunapnammineernerulernissaanik politikkimik ineriartortitsillugit naalagaaffiup tapiissutaanik imaluunniit Tunngaviusumik inatsimmik killilersorneqartarnerat unitsinneqartariaqarpoq, taanna oqarpoq.

Kalaallit Nunaata aamma Danmarkip akornanni atassuteqarnerup naligiinnerusup eqqarsaatigineqarnera nunarsuaq tamakkerlugu politikkimut siunnersuummut Alternativetip ataasinngorpat saqqummiussassaanut ilaavoq.

- Kalaallit Nunaata aamma Savalimmiut naalagaaffeqatigiinneq namminiilivillutik qimakkusullugu kissaateqarpata tapersersussavagut, kissaatigippassullu ikaarsaariarnermut aamma naalagaaffiup nutaap aaqqissuussaanerata pilersikkiartorneqarnerani tapersiissaagut, siunnersuummi ilaatigut tamanna allaqqavoq, taanna aalajangersimasunik siunnersuutinik Folketingimi saqqummiunneqartussanik inerneqassaaq.

Danskit politikkianni allanngulerneq

Partiillu eqqarsaatersuuteqarnera taperserneqariaannaavoq. Socialdemokratietip siulittaasuata Mette Frederiksenip Kalaallit Nunaata namminiilivinnissaanut ikiuunnissamut aqqutissiussinissaq ammaannikuuaa.

- Isumaqarpunga kalaalerpassuit akornanni ullut ilaanni namminiilivinnissamik angusaqarsinnaanermik soorunami kissaateqarneq namminersornerulernermiit namminersornermut ineriartornerup ingerlasimanerata pissusissamisoortumik malitsigissagaa, taanna Martin Breumip atuakkiaani ‘Hvis Grønlands river sig løs’-imi taama oqarpoq.

LÆS OGSÅ: Mette Frederiksenip peqatigiilluni namminiilivikkiartornissamut ammavoq

Alternativetip eqqarsaatersuutai aamma Venstremi politikerip Bertel Haarderip eqqarsaatersuutigisaanit ungasippallaanngillat. Danmarkip Kalaallit Nunaatalu akornanni naligiinnerusumik suleqatigiinniarnermut tunngatillugu Tunngaviusumik inatsimmik killilersuisoqartariaqanngitsoq, taanna isumaqarpoq.

- Kalaallit Nunaata politikkini ineriartortinnerani misilittarnissaanut inissaqartariaqarpoq, assersuutigalugu tunngaviusumik inatsisissamut isumalioqatigiissitaq, Roger Courage Matthisen oqarpoq. 

Maannakkullu nunat taakku marluk akornanni ataqatigiinnerup naligiinnerulernissaa sulissutigineqalereertariaqartoq, Alternativet aamma isumaqarpoq.

LÆS OGSÅ: Naalagaaffeqatigiinneq: Bertel Haarderip 'naalagaasutut eqqarsartarneq' atorunnaarsikkusuppaa

- Kalaallit Nunaata aamma Danmarkip akornanni ataqatigiinnerup naligiinnerulissappat, siullermik Kalaallit Nunaannik aamma kalaallinik ilisimasaqarneq annertuumik qaffannissaa pisariaqarpoq. Suli paasinnittaasoq annertuallaarpoq, kalaallillu pillugu isummiutereertakka amerlavallaarlutik.

Alternativetip naalagaaffeqatigiinneq pillugu siunnersuutaa Nuummi aamma Københavnimi Kalaallit Illuutaanni politikkikkut oqallitsitsisoqarnerannit ineriartortinneqarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER