sakkutooqarneq
Alternativet IA-llu illersornissaq pillugu eqqartueqatigiinniartut
Parti Alternativet Kalaallit Nunaannut tikeraassaaq tassani illersornissamut isumaqatigiinniarnissamut ilassutissanik katersissallutik.
Upernaaru illersornissamut isumaqatigiissut nutaaq Folketingimi isumaqatiginniutigineqassaaq.
Ukiuni makkunani Issittup sammineqarnerulernera, isumaqatiginninniarnermilu inerniunneqartussat Kalaallit Nunaannut isumaqartorujussuussaaq.
Politik-mik
Tamanna tunngavingalugu Alternativet Inuit Ataqatigiit suleqatigalugit, Nunatsinni innuttaasunit peqataaffigineqarsinnaasuni ataatsimeeqattaassapput.
- Kalaallit Nunaat Issittorlu sammineqagaatsiarput, tamanna pissutigalugu tassunga attuumassutillit Nunatsinnilu innuttaasut naalagaaffeqatigiinnermi illersornissamut politikki ilusilersussavaat, Alternativet, illersornissamut oqaaseqartartuat, René Gade, tusagassiuutinut nalunaaruteqarluni allappoq.
Alternativet ilisarnaatigaat politikkimik eqqartuileraagamik, ilinniarsimasut innuttaasullu peqatigalugit partiip politikkia ineriartortinneqartaramikkut.
Nunatsinnullu tikeraarnissartik taasimallugu politik-mik.
Ataatsimiinneq siulleq pissaaq ulloq 20. april Nuummi, tassani Rasmus Leander Nielsen, Ilisimartusarfimmiik, Nils Westergaard, Issittumi Sakkortooqarfimmiik, kiisalu Bjørn Tegner Bay, Kalaallit Nunaanni Politiiniik oqaaseqartuussapput.
IA illersornissamut isumaqatigiinniarnermi peqataarusuppoq
Tassunga atatillugu Inuit Ataqatigiit illersornissamut politikkertik saqqummiukkusuppaat.
- Inuit Ataqatigiit Folketingimi illersornissamut isumaqatiginninniarnerni sunniuteqataarusupput tamannalu pissutigalugu illersornissamut politikkimut siunnersuusiorlutik. Illersornissamut politikki innuttaasut oqaloqatigisarnerisigut siunnersuusiortoqassaaq, Aaja Chemnitz Larsen (IA), tusagassiuutinut nalunaarummini allappoq.